காங்கோவில் கோரத்தாண்டவமாடும் எபோலா வைரஸ்! பலி எண்ணிக்கை 139 ஆக உயர்வு – இன்னும் அதிகரிக்கும் என WHO எச்சரிக்கை!
உலக நாடுகள் கொரோனா மற்றும் பிற பெருந்தொற்றுகளில் இருந்து மீண்டு வந்துள்ள நிலையில், ஆப்பிரிக்க நாடான காங்கோவில் எபோலா (Ebola) வைரஸ் பாதிப்பு மீண்டும் விஸ்வரூபம் எடுத்து உலகையே அச்சுறுத்தத் தொடங்கியுள்ளது. காங்கோ ஜனநாயகக் குடியரசில் (DR Congo) எபோலா வைரஸ் தாக்குதலுக்குப் பலியானோரின் எண்ணிக்கை தொடர்ந்து அதிகரித்து வரும் நிலையில், உலக சுகாதார அமைப்பு (WHO) இதுகுறித்து தீவிர எச்சரிக்கை ஒன்றை விடுத்துள்ளது.
600 பேருக்குப் பரவியதாகச் சந்தேகம்: ஜெனிவாவில் உலக சுகாதார அமைப்பு விளக்கம்
ஜெனீவாவில் செய்தியாளர்களிடம் பேசிய உலக சுகாதார அமைப்பின் தலைவர் டாக்டர் டெட்ரோஸ் அதானோம் கெப்ரேயஸ் (Dr Tedros Adhanom Ghebreyesus), தற்போதைய நிலவரப்படி காங்கோவில் எபோலா பாதிப்பு இருப்பதாகச் சந்தேகிக்கப்படும் வழக்குகளின் எண்ணிக்கை 600-ஐ எட்டியுள்ளதாகத் தெரிவித்துள்ளார்.
அவர்களில் இதுவரை 139 பேர் உயிரிழந்துள்ளனர். இந்த எண்ணிக்கை வரும் நாட்களில் மேலும் அதிகரிக்கக்கூடும் என்று அவர் கவலை தெரிவித்துள்ளார். தற்போதைய நிலவரப்படி, காங்கோவில் 51 பேருக்கும், அதன் அண்டை நாடான உகாண்டாவில் (Uganda) 2 பேருக்கும் எபோலா பாதிப்பு இருப்பது அதிகாரப்பூர்வமாக உறுதி செய்யப்பட்டுள்ளது.
தடுப்பூசிக்குக் கட்டுப்படாத புதிய வகை எபோலா?
இந்த முறை காங்கோவில் பரவி வரும் வைரஸ் ‘புண்டிபுகியோ எபோலாவைரஸ்’ (Bundibugyo ebolavirus) என்ற குறிப்பிட்ட வகையைச் சேர்ந்தது என்று ஆய்வகச் சோதனைகள் உறுதிப்படுத்தியுள்ளன. இது உலக சுகாதார அதிகாரிகளுக்கு மிகப்பெரிய சவாலாக மாறியுள்ளது.
ஏனெனில், தற்போது உலகளவில் பயன்பாட்டில் உள்ள எபோலா தடுப்பூசிகள் மற்றும் சிகிச்சைகள் அனைத்தும் ‘ஜைர் எபோலா’ (Zaire strain) என்ற மற்றொரு வகையைக் கட்டுப்படுத்தவே தயாரிக்கப்பட்டவை ஆகும். இந்த புதிய புண்டிபுகியோ வகைக்கு எதிராகத் தற்போதைய தடுப்பூசிகள் முழுமையாக வேலை செய்யாது என்பதால், நோய் பரவலைக் கட்டுப்படுத்துவது கடினமாக மாறியுள்ளது.
அமெரிக்காவிற்கு பரவிய எபோலா அதிர்ச்சி! அவசரக் கட்டுப்பாடுகளை விதித்த நாடுகள்! உலகப் பெருந்தொற்றாக மாறுமா?
காங்கோவின் இத்துரி (Ituri) மாகாணத்தில் கடந்த சில மாதங்களுக்கு முன்பே இந்த எபோலா பரவல் தொடங்கியிருக்கலாம் என்று கணிக்கப்பட்டுள்ளது. ஆனால், மிகத் தாமதமாகவே இது கண்டறியப்பட்டதால், அதற்குள் இந்த வைரஸ் தீவிரமாகப் பரவத் தொடங்கியுள்ளது. தற்போது இந்தத் தொற்று சர்வதேச அளவிலும் எதிரொலிக்க ஆரம்பித்துள்ளது.
பாதிக்கப்பட்ட அமெரிக்க மருத்துவர் குடும்பம்
காங்கோவில் உள்ள உள்ளூர் மருத்துவமனையில் கடுமையான வயிற்று வலியால் பாதிக்கப்பட்ட நோயாளி ஒருவருக்கு அமெரிக்காவைச் சேர்ந்த மருத்துவர் பீட்டர் ஸ்டாஃபோர்ட் (Peter Stafford) அறுவை சிகிச்சை செய்துள்ளார். அந்த நோயாளி பித்தப்பை தொற்றால் பாதிக்கப்பட்டிருப்பதாக முதலில் நினைத்த நிலையில், அவர் எபோலாவால் இறந்தது சில நாட்களுக்குப் பிறகே தெரியவந்தது.
இதன் காரணமாக மருத்துவர் பீட்டர் ஸ்டாஃபோர்ட், அவரது மனைவி ரெபெக்கா (அவரும் ஒரு மருத்துவர்) மற்றும் அவர்களின் நான்கு குழந்தைகள் தற்போது தீவிரக் கண்காணிப்பில் வைக்கப்பட்டுள்ளனர். எபோலா அறிகுறியுடன் பாதிக்கப்பட்ட ஒரு அமெரிக்கர் தற்போது ஜெர்மனியில் உள்ள சிறப்பு மருத்துவமனையில் அனுமதிக்கப்பட்டு தீவிர சிகிச்சை பெற்று வருகிறார்.
அமெரிக்காவின் அதிரடி உதவிகளும், பயணக் கட்டுப்பாடுகளும்
நிலைமையின் தீவிரத்தைக் கருத்தில் கொண்டு, அமெரிக்க அரசு காங்கோ மற்றும் உகாண்டா நாடுகளிலிருந்து வரும் பயணிகளுக்கு தற்காலிகப் பயணக் கட்டுப்பாடுகளை விதித்துள்ளது. மேலும், நோய் பாதிப்பு உள்ள பகுதிகளில் அவசரக் கால எபோலா பரிசோதனை மற்றும் தனிமைப்படுத்தும் முகாம்களை அமைக்க அமெரிக்கா நிதி உதவி வழங்கி வருகிறது.
உலக சுகாதார அமைப்பின் முக்கிய முடிவு:
கடந்த ஞாயிற்றுக்கிழமை, உலக சுகாதார அமைப்பு (WHO) இந்த எபோலா பரவலை சர்வதேச கவலைக்குரிய பொதுச் சுகாதார அவசரநிலையாக (PHEIC) அறிவித்தது. இருப்பினும், அவசரக் குழுக் கூட்டத்திற்குப் பிறகு பேசிய டாக்டர் டெட்ரோஸ், “இது தேசிய மற்றும் பிராந்திய அளவில் மட்டுமே அதிக ஆபத்தைக் கொண்டுள்ளது; உலகளாவிய அளவில் இதன் ஆபத்து மிகவும் குறைவு என்பதால், இது இன்னும் ‘உலகளாவிய பெருந்தொற்று’ (Pandemic) நிலையை எட்டவில்லை” என்று தெளிவுபடுத்தியுள்ளார்.