ஏற்றுமதி துறைக்கு பெரும் சவாலா?

கட்டாய தொழிலாளர் விவகாரத்தில் இந்தியா உட்பட 54 நாடுகள் மீது அமெரிக்கா நடவடிக்கை

இந்தியா மற்றும் அமெரிக்கா இடையேயான வர்த்தக உறவுகள் தொடர்ந்து வலுப்பெற்று வரும் நிலையில், அமெரிக்காவின் புதிய அறிவிப்பு இந்திய ஏற்றுமதி துறையில் கவலையை ஏற்படுத்தியுள்ளது. கட்டாய தொழிலாளர் (Forced Labour) உற்பத்தி செய்யப்பட்ட பொருட்களின் இறக்குமதியை தடுப்பதில் போதுமான நடவடிக்கைகள் மேற்கொள்ளப்படவில்லை என்ற காரணத்தால், இந்தியா உட்பட 54 நாடுகளின் பொருட்களுக்கு கூடுதல் 12.5 சதவீத சுங்கவரி விதிக்க அமெரிக்க வர்த்தக பிரதிநிதி அலுவலகம் (USTR) முன்மொழிந்துள்ளது.

அமெரிக்காவின் Trade Act 1974-ன் Section 301 சட்டத்தின் கீழ் மேற்கொள்ளப்பட்ட விசாரணையின் அடிப்படையில் இந்த நடவடிக்கை அறிவிக்கப்பட்டுள்ளது. குறிப்பாக கட்டாய தொழிலாளர் உற்பத்தி செய்யப்பட்ட பொருட்கள் உலக சந்தைகளில் நுழைவதை தடுக்க பல நாடுகள் போதுமான சட்ட அமலாக்கத்தை மேற்கொள்ளவில்லை என்று அமெரிக்கா குற்றம்சாட்டியுள்ளது.

இந்த புதிய சுங்கவரி அமலுக்கு வந்தால், இந்தியாவில் இருந்து அமெரிக்காவுக்கு ஏற்றுமதி செய்யப்படும் பல்வேறு பொருட்களின் விலை அதிகரிக்க வாய்ப்புள்ளது. இதனால் இந்திய ஏற்றுமதியாளர்களின் போட்டித்திறன் பாதிக்கப்படலாம் என்று பொருளாதார நிபுணர்கள் எச்சரிக்கின்றனர்.

குறிப்பாக ஜவுளி, ஆடை, உற்பத்தி மற்றும் மின்னணு சாதனங்கள் உள்ளிட்ட துறைகள் இந்த நடவடிக்கையால் அதிகமாக பாதிக்கப்படக்கூடும் என கருதப்படுகிறது. அமெரிக்கா இந்தியாவின் முக்கிய ஏற்றுமதி சந்தைகளில் ஒன்றாக இருப்பதால், இந்த வரி உயர்வு இந்திய நிறுவனங்களுக்கு கூடுதல் சுமையை ஏற்படுத்தும் சூழல் உருவாகியுள்ளது.

இதேவேளை, இந்தியா மற்றும் அமெரிக்கா இடையே சுதந்திர வர்த்தக ஒப்பந்தம் தொடர்பான பேச்சுவார்த்தைகள் நடைபெற்று வரும் நிலையில் இந்த அறிவிப்பு வெளியாகியுள்ளது. இதனால் இருநாடுகளுக்கிடையேயான வர்த்தக பேச்சுவார்த்தைகளிலும் புதிய சவால்கள் உருவாகலாம் என கூறப்படுகிறது.

எனினும், இந்த சுங்கவரி திட்டம் இன்னும் இறுதி செய்யப்படவில்லை. தொழில் நிறுவனங்கள், வர்த்தக அமைப்புகள் மற்றும் பொதுமக்களிடமிருந்து கருத்துகள் பெறப்பட்ட பின்னரே இறுதி முடிவு எடுக்கப்படும் என்று அமெரிக்கா தெரிவித்துள்ளது. அதனால் இந்தியாவுக்கு எதிராக அறிவிக்கப்பட்டுள்ள இந்த கூடுதல் வரி உடனடியாக அமலுக்கு வராது.

மேலும், எரிசக்தி பொருட்கள், மருந்துகள், அரிய கனிமங்கள், விமான உதிரிபாகங்கள் மற்றும் சில விவசாய பொருட்களுக்கு விலக்கு அளிக்கப்படலாம் என்றும் தெரிவிக்கப்பட்டுள்ளது.

உலகளாவிய வர்த்தக சூழலில் புதிய பரபரப்பை ஏற்படுத்தியுள்ள இந்த அறிவிப்பு, இந்திய ஏற்றுமதி துறையின் எதிர்கால வளர்ச்சியில் எந்த அளவிற்கு தாக்கத்தை ஏற்படுத்தும் என்பது அடுத்த சில வாரங்களில் தெளிவாகும். இருப்பினும், அமெரிக்காவின் இந்த நடவடிக்கை இந்தியா – அமெரிக்கா வர்த்தக உறவுகளில் முக்கிய திருப்புமுனையாக பார்க்கப்படுகிறது.