ஐடி பங்குகள் கடும் வீழ்ச்சி
டிசிஎஸ், இன்போசிஸ், ஹெச்எல்சி டெக் பங்குகள் சரிவில்; உலகளாவிய பதற்றம் சந்தையை உலுக்கியது. இந்திய பங்குச்சந்தை இன்று கடும் அழுத்தத்தை சந்தித்தது. வாரத்தின் நடுப்பகுதி வர்த்தகத்தில் சென்செக்ஸ் 600 புள்ளிகளுக்கும் மேல் சரிந்ததுடன், நிப்டி 23,300 புள்ளிகளுக்கு கீழ் வீழ்ந்தது. ஐடி துறையின் முன்னணி பங்குகளில் ஏற்பட்ட திடீர் விற்பனை அழுத்தம் மற்றும் உலகளாவிய அரசியல் பதற்றம் ஆகியவை சந்தை சரிவுக்கு முக்கிய காரணங்களாக அமைந்தன.
வர்த்தக தொடக்கத்திலேயே முதலீட்டாளர்கள் எச்சரிக்கையான அணுகுமுறையை கடைபிடித்தனர். நிப்டி 50 குறியீடு 23,415 புள்ளிகளில் தொடங்கிய நிலையில், தொடர்ந்து விற்பனை அதிகரித்ததால் 23,273 புள்ளிகள் வரை சரிந்தது. அதேபோல், சென்செக்ஸும் 74,500 புள்ளிகளுக்கு அருகில் தொடங்கி, பின்னர் 73,800 புள்ளிகளுக்கும் கீழ் வீழ்ச்சி கண்டது.
இந்த சரிவுக்கு முக்கிய காரணமாக ஐடி பங்குகள் பார்க்கப்படுகின்றன. கடந்த சில நாட்களாக அமெரிக்க சந்தைகளில் செயற்கை நுண்ணறிவு (AI) தொடர்பான நம்பிக்கையால் ஐடி நிறுவனங்களின் பங்குகள் வேகமாக உயர்ந்திருந்தன. அந்த உயர்வுக்குப் பிறகு முதலீட்டாளர்கள் லாபத்தை உறுதிசெய்யும் வகையில் விற்பனையில் ஈடுபட்டதால், டிசிஎஸ், இன்போசிஸ், ஹெச்எல்சி டெக், விப்ரோ மற்றும் டெக் மகிந்திரா உள்ளிட்ட முன்னணி நிறுவனங்களின் பங்குகள் 7 சதவீதம் வரை சரிந்தன.
இதனுடன், அமெரிக்கா – ஈரான் இடையேயான பதற்றம் உலக சந்தைகளில் அச்சத்தை ஏற்படுத்தியுள்ளது. மத்திய கிழக்கில் நிலவும் பதற்றம் காரணமாக கச்சா எண்ணெய் விலை உயர்ந்துள்ளது. எண்ணெய் இறக்குமதியை அதிகமாக சார்ந்துள்ள இந்தியாவுக்கு இது பொருளாதார ரீதியாக பாதிப்பை ஏற்படுத்தும் என்ற அச்சம் முதலீட்டாளர்களிடையே உருவாகியுள்ளது.
மேலும், வெளிநாட்டு நிறுவன முதலீட்டாளர்கள் தொடர்ந்து இந்திய பங்குச்சந்தையில் முதலீடுகளை குறைத்து வருவதும் சந்தை மனநிலையை பாதித்துள்ளது. இந்த ஆண்டில் மட்டும் பல பில்லியன் டாலர் அளவிலான முதலீடுகள் இந்திய சந்தையிலிருந்து வெளியேறியுள்ளதாக தகவல்கள் தெரிவிக்கின்றன.
சந்தை முழுவதும் அழுத்தம் காணப்பட்டாலும், ஐடி துறையின் வீழ்ச்சியே முக்கிய தாக்கத்தை ஏற்படுத்தியது. குறிப்பாக நேற்று சந்தையை உயர்த்திய அதே ஐடி பங்குகளே இன்று பெரிய அளவில் சரிந்தது முதலீட்டாளர்களுக்கு அதிர்ச்சியை ஏற்படுத்தியுள்ளது.
பொருளாதார நிபுணர்களின் கருத்துப்படி, கச்சா எண்ணெய் விலை, அமெரிக்கா – ஈரான் நிலைமை மற்றும் வெளிநாட்டு முதலீட்டு ஓட்டம் ஆகியவை அடுத்த சில நாட்களில் இந்திய பங்குச்சந்தையின் போக்கை தீர்மானிக்கக்கூடிய முக்கிய காரணிகளாக இருக்கும். எனவே முதலீட்டாளர்கள் குறுகிய கால வர்த்தகங்களில் கூடுதல் கவனத்துடன் செயல்பட வேண்டிய சூழல் உருவாகியுள்ளது.