இந்திய ரயில்வேயில் அரசு வேலைக்காக காத்திருக்கும் இளைஞர்களுக்கு மிகப்பெரிய மகிழ்ச்சி செய்தி வெளியாகியுள்ளது. ரயில்வே ஆட்சேர்ப்பு வாரியம் (RRB), நாடு முழுவதும் 6,557 டெக்னீசியன் பணியிடங்களை நிரப்புவதற்கான அதிகாரப்பூர்வ அறிவிப்பை வெளியிட்டுள்ளது. இந்த ஆட்சேர்ப்பு மூலம் Technician Grade-1 Signal மற்றும் Technician Grade-3 பணியிடங்கள் நிரப்பப்பட உள்ளன.
அறிவிப்பின்படி, Technician Grade-1 Signal பிரிவில் 323 காலிப்பணியிடங்களும், Technician Grade-3 பிரிவில் 6,234 காலிப்பணியிடங்களும் உள்ளன. மொத்தமாக 6,557 பணியிடங்கள் நிரப்பப்படவுள்ளதால், நாடு முழுவதும் உள்ள வேலைவாய்ப்பு தேடுபவர்களிடையே பெரும் எதிர்பார்ப்பு உருவாகியுள்ளது.
இந்த ஆட்சேர்ப்புக்கான ஆன்லைன் விண்ணப்ப பதிவு ஜூன் 30 முதல் தொடங்குகிறது. விண்ணப்பிக்க விரும்பும் விண்ணப்பதாரர்கள் ஜூலை 29 இரவு 11.59 மணி வரை அதிகாரப்பூர்வ RRB இணையதளம் மூலம் விண்ணப்பிக்கலாம். கடைசி நேர நெரிசலைத் தவிர்க்க முன்கூட்டியே விண்ணப்பிக்குமாறு அதிகாரிகள் அறிவுறுத்தியுள்ளனர்.
Technician Grade-1 Signal பணிக்கான ஆரம்ப சம்பளம் மாதம் ₹29,200 ஆக நிர்ணயிக்கப்பட்டுள்ளது. அதேபோல் Technician Grade-3 பணிக்கான ஆரம்ப அடிப்படை ஊதியம் ₹19,900 ஆகும். இதனுடன் மத்திய அரசு ஊழியர்களுக்கு வழங்கப்படும் அகவிலைப்படி, வீட்டு வாடகைப்படி மற்றும் பிற சலுகைகளும் வழங்கப்படும்.
வயது வரம்பைப் பொறுத்தவரை, Grade-1 பணிகளுக்கு 18 முதல் 33 வயது வரையும், Grade-3 பணிகளுக்கு 18 முதல் 30 வயது வரையும் தகுதி நிர்ணயிக்கப்பட்டுள்ளது. அரசு விதிகளின்படி இடஒதுக்கீட்டு பிரிவினருக்கு வயது தளர்வும் வழங்கப்படும்.
தேர்வு நடைமுறையில் கணினி வழித் தேர்வு (CBT), ஆவண சரிபார்ப்பு, மருத்துவத் தகுதித் தேர்வு உள்ளிட்ட கட்டங்கள் இடம்பெறும். கல்வித் தகுதி, தேர்வு முறை மற்றும் பாடத்திட்டம் தொடர்பான முழுமையான விவரங்கள் அதிகாரப்பூர்வ அறிவிப்பில் வெளியிடப்பட்டுள்ளன.
மத்திய அரசு வேலை, நிரந்தர பணி, சிறந்த ஊதியம் மற்றும் பதவி உயர்வு வாய்ப்புகள் உள்ளிட்ட பல்வேறு காரணங்களால் ரயில்வே வேலைவாய்ப்புகளுக்கு ஆண்டுதோறும் லட்சக்கணக்கானோர் விண்ணப்பித்து வருகின்றனர். இந்த முறை 6,557 பணியிடங்கள் அறிவிக்கப்பட்டுள்ளதால் போட்டி அதிகமாக இருக்கும் என எதிர்பார்க்கப்படுகிறது.
எனவே, ரயில்வே துறையில் பணியாற்ற வேண்டும் என்று விரும்பும் தகுதியான இளைஞர்கள் அதிகாரப்பூர்வ அறிவிப்பை முழுமையாக படித்து, தேவையான ஆவணங்களை தயார் செய்து, குறிப்பிட்ட காலக்கெடுவுக்குள் விண்ணப்பிக்க வேண்டும் என ரயில்வே ஆட்சேர்ப்பு வாரியம் அறிவுறுத்தியுள்ளது.