வங்காளதேசத்தில் முன்னாள் பிரதமர் ஷேக் ஹசீனா பதவி விலகியதைத் தொடர்ந்து ஏற்பட்டுள்ள அரசியல் மாற்றங்களுக்கு இடையே, அந்நாட்டில் வசிக்கும் இந்துக்கள் உள்ளிட்ட சிறுபான்மையினர் மீது நடத்தப்படும் வன்முறைத் தாக்குதல்கள் சர்வதேச அளவில் அதிர்ச்சியை ஏற்படுத்தி வருகின்றன.
கடந்த டிசம்பர் மாத மத்தியில் வெடித்த வன்முறையில், இந்துக்கள் குறிவைத்துத் தாக்கப்பட்டு வருகின்றனர். இதுவரை ஆலைத் தொழிலாளி, மருந்து கடை உரிமையாளர் மற்றும் தொழிலதிபர்கள் என மொத்தம் 6 இந்துக்கள் கும்பல் தாக்குதலில் கொல்லப்பட்டுள்ளனர். இந்த வரிசையில் தற்போது பெனி மாவட்டத்தைச் சேர்ந்த ஷோமிர் குமார் தாஸ் (28) என்ற ஆட்டோ ஓட்டுநர் மர்ம நபர்களால் படுகொலை செய்யப்பட்டுள்ளார்.
கடந்த ஞாயிற்றுக்கிழமை இரவு தனது ஆட்டோவில் வெளியே சென்ற ஷோமிர், அதன்பின் வீடு திரும்பவில்லை. தேடுதல் வேட்டைக்கு இடையே, நேற்று அதிகாலை 2 மணியளவில் அவரது உடல் கண்டெடுக்கப்பட்டதாக பெனி மாவட்ட போலீஸ் சூப்பிரெண்டு ஷபிகுல் இஸ்லாம் தெரிவித்துள்ளார். அவரது உடல் கைப்பற்றப்பட்டு விசாரணை நடைபெற்று வந்தாலும், இதுவரை யாரும் கைது செய்யப்படவில்லை. மேலும், அவரது வாழ்வாதாரமாக இருந்த ஆட்டோவையும் அந்தக் கும்பல் திருடிச் சென்றுவிட்டதாகக் கூறப்படுகிறது.
இந்தச் சம்பவத்திற்கு இந்திய அளவில் பா.ஜ.க. கடும் கண்டனம் தெரிவித்துள்ளது. இது குறித்துப் பேசிய பா.ஜ.க. மூத்த தலைவர் அமித் மாளவியா, “வங்காளதேச இடைக்கால அரசில் சிறுபான்மையினரின் உயிருக்கு எவ்விதப் பாதுகாப்பும் இல்லை. இந்துக்கள், கிறிஸ்தவர்கள் மற்றும் புத்த மதத்தினர் மீதான தாக்குதல்களைக் கட்டுப்படுத்த முகமது யூனுஸ் தலைமையிலான அரசு தவறிவிட்டது. பாதிக்கப்பட்ட மக்களுக்கு ஆறுதல் கூறக்கூட அந்நாட்டு அரசு முன்வரவில்லை. இந்தத் தாக்குதல்களைக் கற்பனையானவை என அதன் தலைவர்கள் புறந்தள்ளுவது அதிர்ச்சியளிக்கிறது,” எனத் தெரிவித்துள்ளார்.
அடுத்த மாதம் பொதுத் தேர்தல் நடைபெற உள்ள நிலையில், வங்காளதேசத்தில் சிறுபான்மையினருக்கு எதிராகத் தொடர்ந்து நிகழும் இத்தகைய வன்முறைகள் பெரும் பதற்றத்தை உருவாக்கியுள்ளன.