மூர் விதியின் முடிவும் ஹுவாவேயின் புதிய கண்டுபிடிப்பும் (Post-Moore’s Law Era)
உலகளாவிய செமிகண்டக்டர் (Semiconductor) துறையானது, கடந்த பல தசாப்தங்களாக ‘மூர் விதியை’ (Moore’s Law) நம்பியே இயங்கி வந்தது. அதாவது, மைக்ரோசிப்பில் உள்ள டிரான்சிஸ்டர்களின் எண்ணிக்கை இரண்டு ஆண்டுகளுக்கு ஒருமுறை இரட்டிப்பாகும் என்பது இந்த விதியாகும். ஆனால், டிரான்சிஸ்டர்களின் அளவு அணு அளவை நெருங்கும் போது, இந்த வழக்கமான முறை சவாலாக மாறியுள்ளது.
இந்நிலையில், அமெரிக்காவின் கடுமையான ஏற்றுமதி தடைகளை எதிர்கொண்டு வரும் சீனாவின் முன்னணி தொழில்நுட்ப நிறுவனமான ஹுவாவேய் (Huawei), இந்தத் தடைக்கற்களைத் தகர்க்கும் வகையில் ஒரு புதிய சிப் வடிவமைப்புக் கொள்கையை வெளியிட்டுள்ளது
டவ் ஸ்கேலிங் விதி’ மற்றும் ‘லாஜிக்ஃபோல்டிங்’ தொழில்நுட்பம் (Tau Scaling Law)
ஷாங்காயில் நடைபெற்ற சர்வதேச IEEE மாநாட்டில், ஹுவாவேய் விஞ்ஞானிகள் குழுவின் தலைவர் ஹீ டிங்போ (He Tingbo) இந்த புதிய ‘டவ் (τ) ஸ்கேலிங் விதி’ (Tau Scaling Law) மற்றும் புதிய சிப் கட்டமைப்பை அறிமுகப்படுத்தினார்.
டிரான்சிஸ்டர்களின் வடிவத்தை மேலும் மேலும் சிறியதாக்கும் பாரம்பரிய முறைக்கு மாற்றாக, நேரத்தை அடிப்படையாகக் கொண்ட (Time Scaling) புதிய அணுகுமுறையை இந்த விதி முன்வைக்கிறது. இதன் அடிப்படையில், நிறுவனம் ‘லாஜிக்ஃபோல்டிங்’ (LogicFolding) என்ற அதிநவீன தொழில்நுட்பத்தை உருவாக்கியுள்ளது. இந்தத் தொழில்நுட்பம் சிக்னல் கடத்தப்படும் பாதைகளில் உள்ள மின்தடை மற்றும் மின்சுமையைக் குறைத்து, டிரான்சிஸ்டர்களின் அடர்த்தியை (Transistor Density) வியத்தகு முறையில் அதிகரிக்கும்.
2031-க்குள் 1.4 நானோமீட்டர் சிப் அடர்த்தி சாத்தியம்!
அமெரிக்கா விதித்துள்ள வர்த்தகத் தடைகள் காரணமாக, உலகத்தரம் வாய்ந்த அதிநவீன சிப் தயாரிப்பு இயந்திரங்களை (Lithography tools) சீனா இறக்குமதி செய்ய முடியாத நிலை உள்ளது. இதற்கு மாற்றுப் பாதையாக இந்த ‘லாஜிக்ஃபோல்டிங்’ தொழில்நுட்பத்தை ஹுவாவேய் பயன்படுத்துகிறது.
இந்த புதிய விதியின் மூலம், வரும் 2031-ஆம் ஆண்டிற்குள் 1.4 நானோமீட்டர் (1.4 nm) செயல்திறனுக்கு இணையான சிப்களைத் தங்களால் உள்நாட்டிலேயே வடிவமைக்க முடியும் என்று ஹுவாவேய் அறிவித்துள்ளது. மேலும், இந்த ஆண்டின் பிற்பகுதியில் வெளிவரவிருக்கும் ஹுவாவேயின் புதிய ‘கிரின்’ (Kirin) மொபைல் பிராசஸர்களில் இந்த ‘லாஜிக்ஃபோல்டிங்’ தொழில்நுட்பம் முதன்முறையாகப் பயன்படுத்தப்படும் என்றும் நிறுவனம் உறுதிப்படுத்தியுள்ளது.
என்விடியா (Nvidia) நிறுவனத்திற்குப் போட்டியாக சீனா!
கடந்த ஆறு ஆண்டுகளில் மட்டும், இந்த புதிய விதியைப் பயன்படுத்தி பல்வேறு தொழில்துறைகளுக்காக 381 சிப்களை ஹுவாவேய் வெற்றிகரமாக வடிவமைத்து பெருமளவில் உற்பத்தி செய்துள்ளது.
தற்போது அமெரிக்காவின் என்விடியா (Nvidia) நிறுவனம் உலகளாவிய ஏஐ (AI) சிப் சந்தையை ஆதிக்கம் செய்து வரும் வேளையில், அதற்குப் போட்டியாக சீனா தனது சொந்த ‘அஸெண்ட்’ (Ascend AI) மற்றும் ‘குன்பெங்’ (Kunpeng) பிராசஸர்களை வேகமாக மேம்படுத்தி வருகிறது. ஹுவாவேயின் இந்த புதிய தொழில்நுட்ப மைல்கல், செமிகண்டக்டர் துறையில் பிற நாடுகளைச் சாராமல், சீனா முற்றிலும் தனித்து இயங்கும் ஒரு புதிய சகாப்தத்தை நோக்கி நகர்வதை உறுதி செய்கிறது.