இந்திய ரூபாயின் மதிப்பு தொடர்ந்து அழுத்தத்தை சந்தித்து வரும் நிலையில், வெளிநாட்டு முதலீடுகளை அதிகரிக்க மத்திய அரசு முக்கியமான நடவடிக்கையை எடுக்க உள்ளதாக தகவல்கள் வெளியாகியுள்ளன. அதன்படி, இந்திய அரசுப் பத்திரங்களில் (Government Securities) முதலீடு செய்யும் வெளிநாட்டு போர்ட்ஃபோலியோ முதலீட்டாளர்களுக்கு (FPI) விதிக்கப்படும் மூலதன ஆதாய வரியை (Capital Gains Tax) முழுமையாக நீக்க மத்திய அரசு திட்டமிட்டுள்ளதாக தகவல்கள் தெரிவிக்கின்றன.
தற்போது இந்திய அரசுப் பத்திரங்களில் முதலீடு செய்யும் வெளிநாட்டு முதலீட்டாளர்கள், வட்டி வருவாய்க்கு 20 சதவீத வரியும், நீண்டகால முதலீட்டு ஆதாயங்களுக்கு 12.5 சதவீத மூலதன ஆதாய வரியும் செலுத்த வேண்டியுள்ளது. இந்த வரிச்சுமை காரணமாக இந்திய பத்திர சந்தையில் முதலீடு செய்ய வெளிநாட்டு நிறுவனங்கள் தயக்கம் காட்டி வந்ததாக சந்தை வட்டாரங்கள் கூறுகின்றன.
இதனை மாற்றும் வகையில், மத்திய அமைச்சரவை சமீபத்தில் முக்கிய முடிவை எடுத்துள்ளதாக கூறப்படுகிறது. அதன்படி, வெளிநாட்டு முதலீட்டாளர்களுக்கான மூலதன ஆதாய வரியை ரத்து செய்யும் அவசரச் சட்டத்தை (Ordinance) மத்திய அரசு கொண்டு வர திட்டமிட்டுள்ளது. இந்த நடவடிக்கையின் முக்கிய நோக்கம், இந்தியாவிற்குள் அதிகளவில் டாலர் முதலீடுகளை ஈர்ப்பதும், ரூபாய் மதிப்பின் சரிவை கட்டுப்படுத்துவதுமாகும்.
2026 ஆம் ஆண்டில் மட்டும் வெளிநாட்டு முதலீட்டாளர்கள் இந்திய பங்குச்சந்தையிலிருந்து பெருமளவில் முதலீடுகளை வெளியே எடுத்துள்ளனர். அதே நேரத்தில், சர்வதேச கச்சா எண்ணெய் விலை உயர்வு மற்றும் மேற்கு ஆசிய பதற்றம் போன்ற காரணங்களால் ரூபாய் மதிப்பும் 5 சதவீதத்திற்கும் அதிகமாக சரிந்துள்ளது. இந்த சூழ்நிலையில், வெளிநாட்டு முதலீடுகளை மீண்டும் இந்திய சந்தைக்கு ஈர்க்க மத்திய அரசு இந்த வரி சலுகையை வழங்க முடிவு செய்துள்ளதாக தகவல்கள் தெரிவிக்கின்றன.
பொருளாதார நிபுணர்களின் கருத்துப்படி, இந்த நடவடிக்கை அமல்படுத்தப்பட்டால் இந்திய அரசுப் பத்திர சந்தையில் வெளிநாட்டு முதலீடுகள் அதிகரிக்கும். இதன் மூலம் நாட்டிற்கு அதிகளவில் அந்நியச் செலாவணி வரத்து கிடைக்கும். மேலும் ரூபாயின் மதிப்பு நிலைத்தன்மை பெறுவதோடு, அரசின் கடன் திரட்டும் செலவும் குறைய வாய்ப்புள்ளதாக கூறப்படுகிறது.
இந்நிலையில், இந்திய பொருளாதாரத்தை வலுப்படுத்தவும், உலகளாவிய பொருளாதார சவால்களை சமாளிக்கவும் மத்திய அரசு மேற்கொண்டு வரும் முக்கிய நடவடிக்கைகளில் இதுவும் ஒன்றாக பார்க்கப்படுகிறது. வரிச்சலுகை தொடர்பான அதிகாரப்பூர்வ அறிவிப்பு வெளியாகும் பட்சத்தில், இந்திய நிதிச் சந்தையில் புதிய மாற்றங்கள் உருவாகும் என எதிர்பார்க்கப்படுகிறது.