சென்னையில் நேற்று நடந்த உலக கோப்பை கிரிக்கெட் தொடரில் பாகிஸ்தானை, ஆப்கானிஸ்தான் வென்றது. இந்த வெற்றியின் மூலம் ஆப்கானிஸ்தான் அணி 4 புள்ளிகளுடன் புள்ளிப்பட்டியலில் 6-வது இடத்திற்கு முன்னேறி உள்ளது. அடுத்தடுத்து ஏற்பட்டுள்ள தோல்வி குறித்து பாகிஸ்தான் அணியின் கேப்டன் பாபர் அசாம் கூறியதாவது:
“எங்களிடம் நல்ல ஸ்கோர் இருந்தது, ஆனால் பந்துவீச்சில், நாங்கள் மிடில் ஓவர்களில் விக்கெட்டுகளை எடுக்காததால், நாங்கள் வெற்றிப்பாதைக்கு வரமுடியவில்லை. ஒரு உலகக் கோப்பையில், நீங்கள் ஒரு துறையில் கூட சிறப்பாக செயல்படவில்லை என்றால் கூட தோல்வியடைவீர்கள். பந்துவீசும்போது நாங்கள் நன்றாகத் தொடங்கினோம், ஆனால் எங்களால் விக்கெட்டுகளை எடுக்க முடியவில்லை, எல்லாப் புகழும் ஆப்கானிஸ்தானுக்குத்தான். நாங்கள் நன்றாக கிரிக்கெட் விளையாடவில்லை, (குறிப்பாக) பந்துவீச்சு மற்றும் பீல்டிங். ஆடுகளம் இரண்டாவது இன்னிங்சிலும் சுழற்பந்து வீச்சாளர்களுக்கு உதவியாக இருந்தது. ஆனால் அவர்களின் பேட்ஸ்மேன்களுக்கு எந்த அழுத்தமும் கொடுக்கமுடியவில்லை” இவ்வாறு அவர் கூறினார்.