தமிழ் சினிமாவில் 90-களில் முன்னணி நடிகைகளில் ஒருவராக வலம் வந்தவர் நடிகை கஸ்தூரி. தொடர்ந்து தமிழ், தெலுங்கு படங்களில் பல்வேறு குணச்சித்திர கதாப்பாத்திரங்களில் நடித்து வரும் கஸ்தூரி, அவ்வப்போது அரசியல் தொடர்பான கருத்துக்கள், திரைப்பிரபலங்களின் மீது நேரடியான விமர்சனங்களை முன்வைப்பது என பரபரப்பையும் ஏற்படுத்துவார். அவர் பொதுவாக வைக்கும் விமர்சனங்களே இந்துத்துவா, பாஜக ஆதாரவாகவே இருக்கும். திமுக உள்ளிட்ட பிற கட்சிகளை சேர்ந்தவர்களின் விமர்சனங்களுக்கு சமூக வலைதலங்களில் காட்டமாக பதிலளிக்கும் பழக்கமும் கொண்டவர்.
இந்த நிலையில் நடிகை கஸ்தூரி, இன்று தன்னை அதிகாரப்பூர்மாக பாஜகவில் இணைத்துக்கொண்டுள்ளார். பாஜக தலைமை அலுவலகமான கமலாலயத்தில் , அக்கட்சியின் மாநிலத் தலைவர் நயினார் நாகேந்திரன் முன்னிலையில் நடிகை கஸ்தூரி பாஜகவில் இணைந்துகொண்டார்.
இதுகுறித்து எக்ஸ் தளத்தில் பதிவிட்டுள்ள நயினார் நாகேந்திரன், “நடிகை திருமதி.கஸ்தூரி அவர்களும், நடிகையும், சமூக செயற்பாட்டாளரும், Namis South Queen India நிறுவனத்தின் தலைவருமான திருநங்கை நமிதா மாரிமுத்து அவர்களும் இன்று சென்னை பாஜக தலைமை அலுவலகமான கமலாலயத்தில் தமிழ்நாடு பாஜக கலை மற்றும் கலாச்சார பிரிவு தலைவர் திரு. ஃபெஃப்சி சிவா அவர்களின் முன்னிலையில், பாஜகவில் இன்று இணைந்தனர்.
சமூக செயல்பாட்டாளரான திருமதி.கஸ்தூரி அவர்களும் நமீதா மாரிமுத்து அவர்களும் இன்று முதல் அதிகாரப்பூர்வமாக அரசியல் பயணத்தில் இணைந்திருப்பது வரவேற்கத்தக்கது. அவர்களுடைய அரசியல் பயணம் பாஜகவில் தொடங்கி இருப்பதில் மகிழ்ச்சியடைகிறேன்!” என்று குறிப்பிட்டுள்ளார்.