உலக அரங்கில் மீண்டும் பதற்றம்: ஈரானை குறிவைக்கும் அமெரிக்கா!
அமெரிக்காவிற்கும் ஈரானுக்கும் இடையே கடந்த சில மாதங்களாக நீடித்து வரும் போர் பதற்றம் தற்போது புதிய உச்சத்தை எட்டியுள்ளது. இரு நாடுகளுக்கும் இடையே ஒருபுறம் அமைதிப் பேச்சுவார்த்தைகள் மற்றும் ராஜதந்திர முயற்சிகள் தொடர்ந்து நடைபெற்று வந்தாலும், ஈரான் மீது மற்றொரு சுற்று கடுமையான ராணுவத் தாக்குதல்களை (Military Strikes) நடத்த அமெரிக்க அதிபர் டொனால்ட் டிரம்ப் நிர்வாகம் தீவிரமாகத் திட்டமிட்டு வருவதாக வெள்ளை மாளிகை வட்டாரங்கள் தெரிவித்துள்ளன.
மகனின் திருமணத்தை புறக்கணித்த டிரம்ப்: வாஷிங்டனில் அவசர ஆலோசனை
இந்த விவகாரம் எவ்வளவு முக்கியத்துவம் வாய்ந்தது என்பதை உணர்த்தும் வகையில், அமெரிக்க அதிபர் டொனால்ட் டிரம்ப் தனது சொந்த மகனான டொனால்ட் டிரம்ப் ஜூனியரின் (Donald Trump Jr.) திருமண நிகழ்வில் கூட கலந்துகொள்ளப் போவதில்லை என்று அதிகாரப்பூர்வமாக அறிவித்துள்ளார். இது குறித்து தனது சமூக ஊடகப் பக்கமான ‘ட்ரூத் சோஷியல்’ (Truth Social) தளத்தில் பதிவிட்டுள்ள டிரம்ப், “அரசாங்கம் சார்ந்த மிக முக்கியமான சூழ்நிலைகள் காரணமாகவும், நாட்டின் மீதான எனது கடமை காரணமாகவும் என்னால் இந்த வார இறுதியில் வாஷிங்டனை விட்டு வெளியேற முடியாது” என்று குறிப்பிட்டுள்ளார்.
அவர் தனது வழக்கமான விடுமுறை உறைவிடமான நியூ ஜெர்சி கோல்ஃப் மைதானத்திற்குச் செல்வதையும் ரத்து செய்துவிட்டு, வெள்ளை மாளிகையிலேயே தங்கி நிலைமையைக் கண்காணிக்க முடிவு செய்துள்ளார்.
விடுமுறைகளை ரத்து செய்த ராணுவ அதிகாரிகள்: ‘பிளான் பி’ தயார்!
அமெரிக்காவில் இந்த வார இறுதியில் கொண்டாடப்படவிருந்த ‘மெமோரியல் டே’ (Memorial Day) விடுமுறைப் பயணங்களை அந்நாட்டின் முக்கிய ராணுவ மற்றும் உளவுத்துறை அதிகாரிகள் பலரும் அவசரமாக ரத்து செய்துள்ளனர். ஈரான் எப்போது வேண்டுமானாலும் பதிலடித் தாக்குதல் நடத்தலாம் என்பதால், மத்திய கிழக்கு நாடுகளில் உள்ள அமெரிக்க ராணுவ முகாம்களில் பாதுகாப்பு பலப்படுத்தப்பட்டு, வீரர்கள் தயார் நிலையில் வைக்கப்பட்டுள்ளனர்.
அமெரிக்க வெளியுறவுத்துறை அமைச்சர் மார்கோ ரூபியோ (Marco Rubio) இது பற்றிக் கூறுகையில், “ஹார்முஸ் ஜலசந்தியை (Strait of Hormuz) சர்வதேச கப்பல் போக்குவரத்திற்கு ஈரான் முழுமையாகத் திறந்துவிட வேண்டும். அங்கு சுங்கக் கட்டணம் வசூலிக்கும் ஈரானின் முயற்சி ஏற்றுக்கொள்ள முடியாதது. அமைதிப் பேச்சுவார்த்தை தோல்வியடைந்தால், அதனை ராணுவ பலம் கொண்டு திறப்பதற்கான ‘பிளான் பி’ (Plan B) எங்களிடம் தயாராக உள்ளது” என்று எச்சரித்துள்ளார்.
ஈரானுக்கு இறுதி எச்சரிக்கை: அணு ஆயுதக் கொள்கையில் கறார்
வெள்ளை மாளிகை செய்தித் தொடர்பாளர் அன்னா கெல்லி சிபிஎஸ் செய்தி நிறுவனத்திடம் பேசுகையில், அமெரிக்காவின் சிவப்புக் கோடுகள் (Redlines) மிகத் தெளிவானவை என்று கூறினார். “ஈரான் ஒருபோதும் அணு ஆயுதத்தை உருவாக்கக் கூடாது, மேலும் அவர்கள் தங்களது செறிவூட்டப்பட்ட யுரேனியத்தை வைத்திருக்க முடியாது. அமெரிக்காவின் இந்த இறுதிச் சலுகையை ஈரான் நிராகரித்தால், மீண்டும் ராணுவத் தாக்குதல்கள் தொடங்கும்” என்று அவர் தெரிவித்தார்.
மறுபுறம், ஈரானின் இஸ்லாமிய புரட்சிகர காவல்படை (IRGC), அமெரிக்கா அல்லது இஸ்ரேல் தங்கள் மீது மீண்டும் தாக்குதல் நடத்தினால், அது மத்திய கிழக்கைத் தாண்டி உலகளவில் பெரும் போராக வெடிக்கும் என்றும், கற்பனை செய்து பார்க்க முடியாத இடங்களில் கடுமையான பதிலடி கொடுக்கப்படும் என்றும் எச்சரித்துள்ளது. தற்போதைய சூழலில், பாகிஸ்தான் மற்றும் கத்தார் ஆகிய நாடுகள் இரு தரப்புக்கும் இடையே தூதரக ரீதியாகப் பேச்சுவார்த்தை நடத்தி போரைத் தடுக்க இறுதி முயற்சியை மேற்கொண்டு வருகின்றன.