தவெகவில் இணைந்த முன்னாள் அமைச்சர் வெல்லமண்டி நடராஜன்

தமிழக அரசியலில் பரபரப்பை ஏற்படுத்தும் வகையில், அதிமுக முன்னாள் அமைச்சர் வெல்லமண்டி நடராஜன் தமிழக வெற்றி கழகம் (தவெக) கட்சியில் இணைந்துள்ளார். ஏற்கனவே அதிமுகவில் இருந்து பல முக்கிய நிர்வாகிகள் மற்றும் எம்.எல்.ஏ.க்கள் தவெகவில் இணைந்துள்ள சூழலில், தற்போது முன்னாள் அமைச்சர் இணைந்திருப்பது அரசியல் வட்டாரங்களில் பெரும் அதிர்வலைகளை ஏற்படுத்தியுள்ளது.

முன்னாள் முதலமைச்சர் ஓ.பன்னீர்செல்வத்தின் ஆதரவாளராக இருந்து வந்த வெல்லமண்டி நடராஜன், ஓ.பி.எஸ். திமுகவில் இணைந்த பிறகு மீண்டும் எடப்பாடி பழனிசாமி தலைமையிலான அதிமுகவில் இணைந்தார். அதன்பின் அவருக்கு அமைப்புச் செயலாளர் பதவியும் வழங்கப்பட்டது.

என்.ஆனந்தை சந்தித்து தவெகவில் இணைந்த வெல்லமண்டி

தவெக தலைவர் மற்றும் தமிழக முதலமைச்சரான விஜய் டெல்லி பயணத்தில் இருக்கும் நிலையில், கட்சியின் பொதுச் செயலாளர் ‘புஸ்ஸி’ என்.ஆனந்தை நேரில் சந்தித்து வெல்லமண்டி நடராஜன் தவெகவில் இணைந்தார். அவருடன் அவரது மகன் ஜவஹர்லால் நேரு மற்றும் பல ஆதரவாளர்களும் கட்சியில் இணைந்ததாக தகவல்கள் வெளியாகியுள்ளன.

கடந்த 2016ஆம் ஆண்டு திருச்சி கிழக்கு சட்டமன்ற தொகுதியில் அதிமுக சார்பில் போட்டியிட்டு வெற்றி பெற்ற வெல்லமண்டி நடராஜன், ஜெயலலிதா அமைச்சரவையில் சுற்றுலாத்துறை அமைச்சராக பதவி வகித்தவர்.

அதிமுகவில் தொடரும் அதிரடி மாற்றங்கள்

சமீப நாட்களாக அதிமுகவில் இருந்து பல முக்கிய நிர்வாகிகள் மற்றும் எம்.எல்.ஏ.க்கள் விலகி தவெகவில் இணைந்து வருகின்றனர். கடந்த சில நாட்களில் நான்கு அதிமுக எம்.எல்.ஏ.க்கள் தங்களது பதவியை ராஜினாமா செய்து தவெகவில் இணைந்தது அரசியல் வட்டாரங்களில் பெரும் பேசுபொருளாக மாறியது.

இந்த சூழலில், வெல்லமண்டி நடராஜனின் இணைப்பு அதிமுகவுக்கு மேலும் பின்னடைவை ஏற்படுத்தும் என அரசியல் விமர்சகர்கள் கருத்து தெரிவித்து வருகின்றனர்.

திருச்சி கிழக்கு இடைத்தேர்தலில் போட்டியா?

வெல்லமண்டி நடராஜன் தவெகவில் இணைந்ததையடுத்து, நடைபெற உள்ள திருச்சி கிழக்கு சட்டமன்ற தொகுதி இடைத்தேர்தலில் அவர் தவெக சார்பில் போட்டியிட வாய்ப்பு இருப்பதாகவும் தகவல்கள் வெளியாகியுள்ளன.

இது தொடர்பாக அதிகாரப்பூர்வ அறிவிப்பு வெளியாகாத நிலையில், திருச்சி அரசியலில் புதிய மாற்றங்கள் ஏற்படக்கூடும் என எதிர்பார்க்கப்படுகிறது.

தமிழக அரசியலில் தொடர்ந்து நடந்து வரும் கட்சி மாறுதல் மற்றும் அரசியல் நகர்வுகள், அடுத்தடுத்த தேர்தல்களில் பெரிய தாக்கத்தை ஏற்படுத்தும் என அரசியல் பார்வையாளர்கள் கூறுகின்றனர்.