திருச்சி மாநகராட்சி 47-வது வார்டு அமமுக கவுன்சிலராகவும், திருச்சி தெற்கு மாவட்ட அம்மா மக்கள் முன்னேற்றக் கழக செயலாளராகவும் பொறுப்பு வகித்தவர் ப.செந்தில்நாதன். ஓய்வுபெற்ற டிஎஸ்பி பஞ்சநாதனின் மகனான இவர், முன்னாள் தமிழக முதல்வர் ஜெ.ஜெயலலிதாவின் மறைவுக்கு பிறகு டிடிவி தினகரனின் அம்மா மக்கள் முன்னேற்றக் கழகத்தில் இணைந்து செயல்பட்டு வந்தார்.
இந்நிலையில், தலைமையின் மீது ஏற்பட்ட அதிருப்தியின் காரணமாக, 5 பக்கங்கள் கொண்ட விளக்க கடிதம் எழுதி சமீபத்தில் தனது மாவட்ட செயலாளர் பொறுப்பை ராஜினாமா செய்தார். இந்நிலையில், தமிழக வெற்றி கழக பொதுச் செயலாளரும், அமைச்சருமான புஸ்ஸி ஆனந்த் முன்னிலையில் தனது ஆதரவாளர்களுடன் இன்று (ஜூன் 13) த.வெ.கவில் இணைந்தார்
இவருடன்திருச்சி தெற்கு மாவட்ட அமமுகவில் பணியாற்றிய 11 பகுதி, ஒன்றிய செயலாளர்கள், 13 அணி செயலாளர்கள், 31 வட்ட செயலாளர்கள்களும் த.வெ.கவில் இணைந்தனர்.
சென்னை பனையூரில் நடைபெற்ற நிகழ்ச்சியில் மாற்றுக் கட்சியினர் மற்றும் பல்வேறு துறைகளைச் சேர்ந்தவர்கள் பங்கேற்றனர்.
இந்நிலையில், நடிகர் டி.எஸ்.ஆர். சீனிவாசன் உள்ளிட்ட முக்கிய நபர்கள் இன்று (ஜூன்.13) தமிழக வெற்றிக் கழகத்தில் இணைந்தனர்.முன்னதாக, பாஜகவில் இருந்து விலகிய முன்னாள் சட்டமன்ற உறுப்பினர் விஜயதரணி, தவெக-வில் இணைந்தார்.
திரைத்துறையில் குணச்சித்திர வேடங்களில் நடித்து மக்கள் மத்தியில் பிரபலமான நடிகர் டி.எஸ்.ஆர். சீனிவாசன், த.வெ.க-வின் கொள்கைகளால் ஈர்க்கப்பட்டு இன்று அக்கட்சியில் இணைந்தார். அவருக்குத் த.வெ.க-வின் முக்கிய நிர்வாகிகள் கட்சியின் உறுப்பினர் அட்டையை வழங்கி, பொன்னாடை போர்த்தி இன்முகத்தோடு தங்களது வரவேற்பை அளித்தனர்.