திரைப்பட இயக்குநர் சஞ்சய் குப்தாவின் திடீர் மறைவு செய்தி பாலிவுட் திரையுலகினரையும் ரசிகர்களையும் பெரும் அதிர்ச்சியில் ஆழ்த்தியுள்ளது. அக்டோபர் 30-ஆம் தேதி இரவில் காலமான இவரின் மறைவு செய்தி அக்டோபர் 31-ஆம் தேதி அதிகாலையில் வெளியானது. ‘ஃபிலிம் இன்ஃபர்மேஷன்’ (Film Information) அறிக்கையின்படி, சஞ்சய் குப்தா தனது வீட்டின் குளியலறைக்குள் தவறி விழுந்துள்ளார். இருப்பினும், சனிக்கிழமை காலையில் அவர் சடலமாகக் கண்டெடுக்கப்படும் வரை என்ன நடந்தது என்பது யாருக்கும் தெரியவரவில்லை எனக் கூறப்படுகிறது. அவரது மறைவு குறித்தான துல்லியமான பின்னணி இன்னமும் தெரியவரவில்லை. இது தொடர்பான கூடுதல் தகவல்கள் எதிர்பார்க்கப்படுகின்றன.
சஞ்சய் குப்தா தனது தனித்துவமான ஸ்டைலிஷ் இயக்கம், அதிரடி சண்டைக் காட்சிகள் மற்றும் குற்றப்பின்னணி சார்ந்த படங்களுக்காகப் பெயர் பெற்றவர். 1994-ஆம் ஆண்டு சஞ்சய் தத், ஆதித்யா பஞ்சோலி, ரவீனா டாண்டன் மற்றும் கரிஷ்மா கபூர் நடித்த ‘ஆதிஷ்: ஃபீல் தி ஃபையர்’ (Aatish: Feel the Fire) திரைப்படம் மூலம் இவர் இயக்குநராக அறிமுகமானார். தொடர்ந்து ‘ராம் சாஸ்த்ரா’, ‘ஹமேஷா’, ‘ஜங்’ மற்றும் ‘கௌஃப்’ ஆகிய திரைப்படங்களை இயங்கினார்.
2002-ஆம் ஆண்டு வெளியான ‘காண்டே’ (Kaante) திரைப்படம் இவரது திரைப் பயணத்தில் மிக முக்கியமான ஒன்றாகக் கருதப்படுகிறது. அமிதாப் பச்சன், சஞ்சய் தத், சுனில் ஷெட்டி, மகேஷ் மஞ்ச்ரேகர் மற்றும் லக்கி அலி உள்ளிட்டோர் நடித்த இந்த க்ரைம் த்ரில்லர் திரைப்படம், காலப்போக்கில் ரசிகர்களின் பேராதரவைப் பெற்று இவருக்குப் பெரும் புகழைப் பெற்றுத் தந்தது.
அதன்பின்னர் ‘முசாஃபிர்’, ‘ஜிந்தா’, ‘தஸ் கஹானியான்’, ‘ஷூட்அவுட் அட் வடாலா’, ‘ஜஜ்பா’, ‘காபில்’ மற்றும் ‘மும்பை சாகா’ உள்ளிட்ட பல திரைப்படங்களை இவர் இயக்கியுள்ளார். மேலும், தனது ‘ஒயிட் ஃபெதர் ஃபிலிம்ஸ்’ (White Feather Films) தயாரிப்பு நிறுவனத்தின் கீழ் ‘ஷூட்அவுட் அட் லோகண்ட்வாலா’, ‘பிளான்’, ‘ஆசிட் ஃபேக்டரி’ மற்றும் ‘வுட்ஸ்டாக் வில்லா’ போன்ற திரைப்படங்களைத் தயாரித்தும் உள்ளார்.
நடிகர்கள் சஞ்சய் தத் மற்றும் ஜான் ஆபிரகாம் ஆகியோருடன் இவர் இணைந்து பணியாற்றிய படங்கள் மறக்க முடியாத பல வெற்றிகளைப் பெற்றன. குறிப்பாக ‘ஷூட்அவுட்’ திரைப்பட வரிசைகள் (Shootout franchise) இவரது திரை வாழ்க்கையில் மிக முக்கியப் பங்கு வகித்தன. ரித்திக் ரோஷன் மற்றும் யமி கௌதம் நடித்த ‘காபில்’ திரைப்படம் மூலம் மாறுபட்ட கதைகளத்தையும் இவர் கையாண்டிருந்தார்.
மூன்று தசாப்தங்களுக்கும் மேலாக நீடித்த தனது திரை வாழ்க்கையில், இந்தி சினிமாவில் தனக்கென ஒரு தனித்துவமான முத்திரையைச் சஞ்சய் குப்தா பதித்துள்ளார். அதிரடி மற்றும் குற்றப்பின்னணி சார்ந்த படங்களுக்கு அவர் ஆற்றிய பங்களிப்பு என்றென்றும் நினைவுகூரப்படும்.