ஈரோடு மாவட்டம், சத்தியமங்கலம் அருகே பெய்த கனமழை காரணமாக தரைப்பாலம் சேதமடைந்ததால் இன்று காலை போக்குவரத்து பாதிக்கப்பட்டது. வெள்ளநீர் வடிந்ததைத் தொடர்ந்து தற்போது மீண்டும் போக்குவரத்து தொடங்கியுள்ளது.
சத்தியமங்கலம் புலிகள் காப்பகத்திற்கு உட்பட்ட வனப்பகுதிகளில் நேற்று இரவு பரவலாக கனமழை பெய்தது. இதன் காரணமாக வனப்பகுதியில் இருந்து பெருக்கெடுத்து வந்த மழைநீர், மேட்டுப்பாளையம் செல்லும் சாலையில் உள்ள ஐயன்தாலை கிராமம் அருகே அமைக்கப்பட்டிருந்த தற்காலிக தரைப்பாலத்தின் வழியாகப் பெருக்கெடுத்து ஓடியது.
இந்தப் பகுதியில் ஏற்கனவே புதிய உயர்மட்டப் பாலம் கட்டும் பணி நடைபெற்று வருகிறது. இதற்காக, அதன் அருகே தற்காலிகமாக தரைப்பாலம் அமைக்கப்பட்டு, அதன் வழியாக வாகனப் போக்குவரத்து நடைபெற்று வந்தது.
இந்நிலையில், நேற்று நள்ளிரவு 12 மணி முதல் தொடர்ந்து பெய்த கனமழையால் வாய்க்கால்புதூர் வனப்பகுதியில் இருந்து பெருக்கெடுத்து வந்த வெள்ளநீர் தரைப்பாலத்தைச் சேதப்படுத்தியது. இதனால் இன்று காலை 6 மணி முதல் சுமார் 10 மணி வரை அந்த வழியாக வாகனங்கள் செல்ல முடியாமல் போக்குவரத்து முற்றிலும் பாதிக்கப்பட்டது.
இதன் காரணமாக அவ்வழியாகச் சென்ற வாகனங்கள் காத்திருக்க வேண்டிய நிலை ஏற்பட்டது. தொடர்ந்து மழைநீர் வடிந்து வெள்ளப்பெருக்கு குறைந்ததைத் தொடர்ந்து, தற்போது மீண்டும் வாகனப் போக்குவரத்து தொடங்கியுள்ளது.
ஏற்கனவே இந்தப் பகுதியில் உயர்மட்டப் பாலம் கட்டும் பணி நடைபெற்று வரும் நிலையில், தற்காலிக தரைப்பாலம் மழை வெள்ளத்தால் சேதமடைந்த சம்பவம் வாகன ஓட்டிகளிடையே சிரமத்தை ஏற்படுத்தியுள்ளது.