தமிழக வெற்றிக் கழகத்தின் (தவெக) தலைவரும் தமிழக முதலமைச்சருமான விஜய் மற்றும் அவரது மனைவி சங்கீதா இடையேயான விவாகரத்து வழக்கு விசாரணை செங்கல்பட்டு குடும்ப நல நீதிமன்றத்தில் இன்று மீண்டும் எடுத்துக்கொள்ளப்பட்டது. இன்றைய விசாரணையின் போது இரு தரப்பிலும் முக்கிய முடிவுகள் மற்றும் கோரிக்கைகள் முன்வைக்கப்பட்ட நிலையில், வழக்கை வரும் ஆகஸ்ட் 7-ஆம் தேதிக்கு ஒத்திவைத்து நீதிமன்றம் அதிரடி உத்தர பிறப்பித்துள்ளது.
கடந்த 1999-ஆம் ஆண்டு ஆகஸ்ட் 25 அன்று பெற்றோர் சம்மதத்துடன் பாரம்பரிய முறைப்படி திருமணம் செய்துகொண்ட விஜய் – சங்கீதா தம்பதியருக்கு ஒரு மகனும் ஒரு மகளும் உள்ளனர். சுமார் 25 ஆண்டுகால திருமண வாழ்க்கைக்குப் பிறகு இருவருக்கும் இடையே ஏற்பட்ட தீவிர கருத்து வேறுபாடு காரணமாக கடந்த சில மாதங்களாக பிரிந்து வாழ்ந்து வருகின்றனர். இதனைத் தொடர்ந்து, கடந்த பிப்ரவரி மாதம் செங்கல்பட்டு நீதிமன்றத்தில் சங்கீதா அதிகாரப்பூர்வமாக விவாகரத்து கோரி மனு தாக்கல் செய்தார். இந்த விவகாரம் தமிழக அரசியல் மற்றும் திரைத்துறையில் பெரும் விவாதப் பொருளாக மாறியது.
ஏற்கனவே கடந்த ஏப்ரல் 20 அன்று நடைபெற்ற முதல்கட்ட விசாரணையின் போது, தவெக தலைவர் விஜய் மற்றும் சங்கீதா ஆகிய இரு தரப்பும் நேரில் ஆஜராவதிலிருந்து விலக்கு பெற்று, அடுத்தடுத்த விசாரணைகளில் வீடியோ கான்பரன்ஸ் (காணொளி காட்சி) மூலம் ஆஜராக நீதிமன்றம் அனுமதி அளித்திருந்தது. அதன்படி, இந்த வழக்கு இன்று (ஜூன் 15) செங்கல்பட்டு குடும்ப நல நீதிமன்றத்தில் நீதிபதி முன்னிலையில் மீண்டும் விசாரணைக்கு வந்தது.
ஆகஸ்ட் மாதத்திற்கு தள்ளிவைப்பு
இன்றைய விசாரணையின் போது இரு தரப்பு வழக்கறிஞர்களும் ஆஜராகி தங்களின் வாதங்களை முன்வைத்தனர். வழக்கு தொடர்பான ஆவணங்கள் மற்றும் தற்போதைய சூழலை ஆய்வு செய்த நீதிமன்றம், இந்த விவாகரத்து வழக்கின் அடுத்தகட்ட விசாரணையை வரும் ஆகஸ்ட் 7-ஆம் தேதிக்கு ஒத்திவைப்பதாக அறிவித்துள்ளது. மேலும், தங்களின் குடும்பப் பிரச்சனை மற்றும் நீதிமன்ற நடவடிக்கைகள் குறித்து ஊடகங்களில் விவாதிப்பதற்கோ அல்லது செய்திகளை வெளியிடுவதற்கோ தடை விதிக்கக் கோரி இரு தரப்பிலும் ஏற்கனவே மனுக்கள் தாக்கல் செய்யப்பட்டுள்ளது குறிப்பிடத்தக்கது.
நீண்ட கால திருமண பந்தத்திற்குப் பிறகு எழுந்துள்ள இந்த விவாகரத்து விவகாரம் சட்ட ரீதியாகத் தொடர்ந்து நகர்ந்து வருகிறது. நீதிமன்றம் வழங்கியுள்ள அடுத்தகட்ட அவகாசத்தின் மூலம் இரு தரப்பினரும் தங்களின் சட்டப்பூர்வமான அடுத்தகட்ட நகர்வுகளை மேற்கொள்ளத் திட்டமிட்டுள்ளனர். தனிநபர் உரிமை மற்றும் குடும்ப நல விவகாரம் என்பதால், நீதிமன்றம் இதனை மிகவும் கவனமுடன் கையாண்டு வருகிறது. ஆகஸ்ட் 7-ஆம் தேதி நடைபெறவுள்ள அடுத்த விசாரணையில் இந்த வழக்கின் அடுத்தக்கட்டப் போக்கு தெரியவரும்.
செங்கல்பட்டு, 15 ஜூன் 2026 — ETamilNews நிருபர்