தமிழ்நாடு அரசின் ஊரக வளர்ச்சித் துறைக்குச் சொந்தமான வங்கிக் கணக்குகளில் இருந்து ரூ.22.10 கோடி ஆன்லைன் மூலம் மோசடி செய்யப்பட்டுள்ளதாக வெளியான தகவல் அதிர்ச்சியை ஏற்படுத்தியுள்ளது.
தமிழகத்தில் உள்ள மூன்று ஊராட்சி ஒன்றியங்களின் வங்கிக் கணக்குகளில் இணையவழியாக ஊடுருவி, பல்வேறு பரிவர்த்தனைகள் மூலம் பணம் திருடப்பட்டதாகக் கூறப்படுகிறது.
குறிப்பாக, ராமநாதபுரம் மாவட்டம் மண்டபம் ஊராட்சி ஒன்றியத்தில் ரூ.14 கோடியும், நாகப்பட்டினம் ஊராட்சி ஒன்றியத்தில் ரூ.3.10 கோடியும், மூன்றாவது ஊராட்சி ஒன்றியத்தில் ரூ.5 கோடியும் மோசடி செய்யப்பட்டுள்ளதாகத் தகவல் வெளியாகியுள்ளது.
இந்த மோசடியில் நைஜீரியாவைச் சேர்ந்த சைபர் குற்றக் கும்பலுக்குத் தொடர்பு இருக்கலாம் என போலீசார் சந்தேகிக்கின்றனர். இருப்பினும், கும்பலின் தொடர்பு இன்னும் உறுதிப்படுத்தப்படவில்லை.
அரசுத் திட்டங்களுக்காக ஒதுக்கப்பட்ட நிதி மோசடி செய்யப்பட்டுள்ளதாக எழுந்துள்ள புகார் குறித்து, பணம் எந்தெந்த வங்கிக் கணக்குகளுக்கு மாற்றப்பட்டது, மோசடியில் ஈடுபட்டவர்கள் யார் என்பது தொடர்பாக சைபர் கிரைம் போலீசார் தீவிர விசாரணை நடத்தி வருகின்றனர்.