₹15 லட்சம் கோடி மோசடியா? ராஜேஷ் எக்ஸ்போர்ட்ஸ் மீது செபியின் அதிரடி நடவடிக்கை!
இந்தியாவின் முன்னணி தங்க நகை ஏற்றுமதி நிறுவனங்களில் ஒன்றாக விளங்கி வந்த ராஜேஷ் எக்ஸ்போர்ட்ஸ் தற்போது மிகப்பெரிய சர்ச்சையில் சிக்கியுள்ளது. இந்திய பங்குச்சந்தை கட்டுப்பாட்டு அமைப்பான செபி (SEBI), அந்த நிறுவனம் பல ஆண்டுகளாக தனது வருவாய் விவரங்களை மிகப்பெரிய அளவில் தவறாகக் காட்டியிருப்பதாக குற்றம்சாட்டியுள்ளது. செபி வெளியிட்ட இடைக்கால உத்தரவின்படி, சுமார் ₹15.15 லட்சம் கோடி ரூபாய் மதிப்பிலான வருவாய் விவரங்கள் தவறாக பதிவு செய்யப்பட்டிருக்கலாம் என சந்தேகம் எழுந்துள்ளது.
இந்த விவகாரம் வெளிச்சத்துக்கு வந்ததைத் தொடர்ந்து, ராஜேஷ் எக்ஸ்போர்ட்ஸ் மற்றும் அதன் தலைவர் ராஜேஷ் மேத்தா மீது செபி கடுமையான நடவடிக்கை எடுத்துள்ளது. விசாரணை முடியும் வரை பங்குச்சந்தையில் வர்த்தகம் செய்யவும், சில சந்தை நடவடிக்கைகளில் ஈடுபடவும் தடை விதிக்கப்பட்டுள்ளது.
எப்படி நடந்தது இந்த முறைகேடு?
செபி விசாரணையில், நிறுவனத்தின் மொத்த வருவாயில் 97 முதல் 99 சதவீதம் வரை வெளிநாட்டு துணை நிறுவனங்கள் மூலம் வந்ததாகக் காட்டப்பட்டிருந்தது. குறிப்பாக சுவிட்சர்லாந்தில் செயல்படும் ஒரு துணை நிறுவனம் முக்கிய வருவாய் ஆதாரமாக காட்டப்பட்டிருந்தாலும், அதன் நிதி அறிக்கைகளில் அதற்கான ஆதாரங்கள் போதுமான அளவில் இல்லை என்று கூறப்பட்டுள்ளது. மேலும், சில வெளிநாட்டு நிறுவனங்களின் பரிவர்த்தனைகள் சரிபார்க்கப்படாதவை என்றும் செபி தெரிவித்துள்ளது.
விசாரணைக்கு தேவையான ஆவணங்களை நிறுவனம் முழுமையாக வழங்கவில்லை என்றும், அதிகாரிகளுடன் ஒத்துழைப்பு குறைவாக இருந்ததாகவும் குற்றச்சாட்டு எழுந்துள்ளது. இதனால் செபி தடயவியல் (Forensic) ஆய்வையும் தீவிரப்படுத்தியுள்ளது.
பங்குச்சந்தையில் அதிர்ச்சி… முதலீட்டாளர்கள் கவலை!
செபியின் நடவடிக்கைக்கு பின்னர் ராஜேஷ் எக்ஸ்போர்ட்ஸ் பங்குகள் கடுமையாக சரிந்தன. முதலீட்டாளர்கள் மத்தியில் நம்பிக்கை குறைந்ததால், நிறுவனத்தின் பங்கு விலை ஒரே நாளில் 5 சதவீத கீழ்நிலை வரம்பைத் தொட்டது. இந்த விவகாரம் இந்திய கார்ப்பரேட் வரலாற்றில் மிகப்பெரிய நிதி முறைகேடுகளில் ஒன்றாக மாறக்கூடும் என்று சந்தை வல்லுநர்கள் கூறுகின்றனர்.
இதற்கிடையில், ராஜேஷ் எக்ஸ்போர்ட்ஸ் தரப்பில் இருந்து குற்றச்சாட்டுகளுக்கு விரிவான பதில் இதுவரை வெளியாகவில்லை. விசாரணை தொடர்ந்து நடைபெற்று வருவதால், அடுத்த சில வாரங்களில் மேலும் பல அதிர்ச்சி தகவல்கள் வெளியாகலாம் என எதிர்பார்க்கப்படுகிறது.