தாராபுரத்தில் திமுக வேட்பாளர் சுகன்யாவை ஆதரித்து உதயநிதி ஸ்டாலின் இன்று மாலை பிரசாரம் மேற்கொள்கிறார். தாராபுரம் இடைத்தேர்தல் வருகிற 6ம் தேதி நடைபெற உள்ளது. வாக்கு எண்ணிக்கை 9ம் தேதி நடக்கிறது. இந்த இடைத்தேர்தலில் திமுக சார்பில் வழக்கறிஞர் சுகன்யா போட்டியிடுகிறார். சுகன்யா வேட்பாளராக அறிவிக்கப்பட்டதிலிருந்து திமுக தலைவர்கள் மற்றும் கூட்டணி கட்சி தலைவர்கள் தாராபுரம் தொகுதியில் பிரசாரம் செய்து வருகிறார்கள்.தமிழக எதிர்க்கட்சித்தலைவர் உதயநிதி ஸ்டாலின், கனிமொழி எம்பி மற்றும் திராவிடர் கழகத்தலைவர் வீரமணி, தேமுதிக தலைவர் பிரேமலதா விஜயகாந்த் உள்பட திமுக கூட்டணி கட்சித் தலைவர்களும் பலர் பிரசாரம் செய்து வருகிறார்கள்.
இது தவிர முன்னாள் அமைச்சர்கள் கே.என்.நேரு, செந்தில் பாலாஜி, மு.பெ.சாமிநாதன், முன்னாள் சபாநாயகர் அப்பாவு, அன்பில் மகேஷ் பொய்யாமொழி, தங்கம் தென்னரசு, கயல்விழி செல்வராஜ் உள்பட பல அமைச்சர்கள் மற்றும் மாவட்ட செயலாளர்கள் தங்களுக்கு ஒதுக்கப்பட்ட பகுதிகளில் தொடர்ந்து பிரசாரங்கள் மேற்கொண்டு வருகிறார்கள். இந்நிலையில் நேற்று சுகன்யாவை ஆதரித்து திமுக தலைவர் மு.க. ஸ்டாலின் மாருதி நகர் பகுதியில் பிரசார பொதுக்கூட்டம் மேற்கொண்டார். இதில் 20 ஆயிரத்துக்கும் மேற்பட்ட பொதுமக்கள் மற்றும் தொண்டர்கள் கலந்து கொண்டனர்.
மாநில செய்திகள்
தாராபுரம் தொகுதியில் பலர் பிரசாரம் செய்து வரும் நிலையில் உதயநிதி ஸ்டாலின் பிரசாரம் தனிக் கவனம் பெற்றுள்ளது. தமிழக எதிர்க்கட்சித் தலைவரும் திமுக இளைஞரணி செயலாளருமான உதயநிதி ஸ்டாலின் திமுக வேட்பாளர் சுகன்யாவை ஆதரித்து கடந்த 26ம் தேதி தேர்தல் பிரசாரம் மேற்கொண்டார். தாராபுரம் பகுதிக்கு உட்பட்ட கன்னிவாடி, மூலனூர், புது பஸ் நிலையம், குண்டடம் ஆகிய பகுதிகளில் தேர்தல் பிரசாரம் செய்தார்.
இந்நிலையில் தாராபுரம் தொகுதியில் மீண்டும் ஒருமுறை தமிழக எதிர்க்கட்சித் தலைவர் உதயநிதி ஸ்டாலின் இன்று மாலை பிரசாரம் மேற்கொள்ள உள்ளார். இன்று மாலை 4 மணிக்கு குண்டடம் மேற்கு ஒன்றியம் நொச்சிபாளையம் பகுதி, மாலை 5:30 மணிக்கு தாராபுரம் மேற்கு ஒன்றியம் தாளவாய்பட்டினம், 6 மணிக்கு தாராபுரம் நகரம் பெரியார் சிலை அருகே, 7 மணிக்கு தாராபுரம் நகரம் வடதாரப்பகுதியில் திறந்தவெனில் சுகன்யாவை ஆதரித்து பிரச்சாரம் மேற்கொள்கிறார்.
அரசியல் செய்திகள்
நாளை (ஞாயிறு) மாலை 6 மணியுடன் தேர்தல் பிரசாரம் முடிவடையும் நிலையில், எதிர்க்கட்சித் தலைவர் உதயநிதி ஸ்டாலின் வருகை தொண்டர்கள் மத்தியில் மிகுந்த எதிர்பார்ப்பை ஏற்படுத்தி உள்ளது. இதற்கிடையே அதிமுக வேட்பாளர் பானுமதியை ஆதரித்து மூலனூர் வேன்நிறுத்தம் மற்றும் தாராபுரம் அண்ணா சிலை அருகே அ.ம.மு.க. பொதுச்செயலாளர் டிடிவி தினகரன் இன்று மாலை பிரசாரம் மேற்கொள்கிறார். மேலும் நாம் தமிழர் கட்சி ஒருங்கிணைப்பாளர் நாம் தமிழர் கட்சி வேட்பாளரை ஆதரித்து சத்திரம் பொள்ளாச்சி சாலை, மானூர் பாளையம், குண்டடம் ஆகிய இடங்களில் இன்று மாலை பிரசாரம் மேற்கொள்கிறார். இதைத் தொடர்ந்து நாளை மீண்டும் முதல்வர் விஜய் தாராபுரத்தில் ரோடு ஷோ நடத்த திட்டமிட்டுள்ளார்.