சோகத்தில் மூழ்கிய உறவினர்கள்
நோய்வாய்ப்பட்ட தந்தையை பார்க்க வந்த குடும்பத்துக்கு நேர்ந்த கொடூரம்… 21 பேர் உயிரிழந்த டெல்லி தீ விபத்து அதிர்ச்சி
டெல்லியின் மாளவியா நகர் பகுதியில் உள்ள ஒரு ஹோட்டலில் ஏற்பட்ட பயங்கர தீ விபத்தில் ஒரே குடும்பத்தைச் சேர்ந்த 8 பேர் உயிரிழந்த சம்பவம் நாடு முழுவதும் பெரும் அதிர்ச்சியை ஏற்படுத்தியுள்ளது. குருகிராமைச் சேர்ந்த அகர்வால் குடும்ப உறுப்பினர்கள், உடல்நலக்குறைவால் மருத்துவமனையில் அனுமதிக்கப்பட்டிருந்த வயதான குடும்பத் தலைவரை பார்க்க டெல்லி வந்திருந்த நிலையில், இந்த துயர சம்பவம் நிகழ்ந்துள்ளது.
தீ விபத்து ஏற்பட்ட ஹோட்டலில் தங்கியிருந்த அகர்வால் குடும்பத்தினர் பலரும் தீ மற்றும் புகை காரணமாக வெளியேற முடியாமல் சிக்கிக் கொண்டனர். இதில் குடும்பத்தின் மூத்த பெண் உறுப்பினர், அவரது மகன், மருமகள், பேரக்குழந்தைகள் உள்ளிட்ட 8 பேர் உயிரிழந்தனர். குடும்பத்தினர் அனைவரும் ஒன்றாக டெல்லி வந்திருந்த நிலையில், இந்த விபத்து அவர்களின் வாழ்க்கையை சோகத்தில் ஆழ்த்தியுள்ளது.
உயிரிழந்தவர்களின் இறுதிச் சடங்குகள் பின்னர் நடைபெற்றன. குடும்பத்தின் மூத்த உறுப்பினர் மருத்துவமனையில் சிகிச்சை பெற்று வரும் நிலையில், இந்த சம்பவம் குறித்த தகவல் அவரிடம் இன்னும் தெரிவிக்கப்படவில்லை என்று உறவினர்கள் தெரிவித்துள்ளனர்.
இந்த தீ விபத்து டெல்லியின் மாளவியா நகர் பகுதியில் உள்ள “Flourish Stay” என்ற தங்கும் விடுதியில் ஏற்பட்டது. கட்டிடத்தின் தரைத்தளத்தில் செயல்பட்டு வந்த உணவகப் பகுதியில் இருந்து தீ பரவியிருக்கலாம் என ஆரம்ப கட்ட விசாரணைகள் தெரிவிக்கின்றன. தீ விபத்து நேரத்தில் ஹோட்டலில் சுமார் 47 பேர் தங்கியிருந்ததாக தகவல்கள் வெளியாகியுள்ளன.
தீ விபத்து ஏற்பட்ட சில நிமிடங்களிலேயே கரும்புகை கட்டிடம் முழுவதும் பரவியதால் பலர் வெளியேற முடியாமல் சிக்கிக் கொண்டனர். சிலர் உயிரைக் காப்பாற்ற ஜன்னல்கள் வழியாக குதித்தனர். அப்பகுதி மக்கள் மெத்தைகளை விரித்து பலரை மீட்க உதவியதாக நேரில் பார்த்தவர்கள் தெரிவித்துள்ளனர்.
இந்த சம்பவத்தில் மொத்தம் 21 பேர் உயிரிழந்துள்ளனர். உயிரிழந்தவர்களில் வெளிநாட்டு குடிமக்களும் இருப்பதாக அதிகாரப்பூர்வ தகவல்கள் தெரிவிக்கின்றன. மேலும் 40-க்கும் மேற்பட்டோர் காயங்களுடன் மருத்துவமனைகளில் சிகிச்சை பெற்று வருகின்றனர்.
விபத்துக்கு பிறகு மேற்கொள்ளப்பட்ட ஆரம்பகட்ட ஆய்வில், ஹோட்டலில் போதுமான தீயணைப்பு பாதுகாப்பு வசதிகள் இல்லாதது, அனுமதிக்கப்பட்ட அளவை விட அதிகமாக கட்டிடம் பயன்படுத்தப்பட்டதாகவும் தகவல்கள் வெளியாகியுள்ளன. ஹோட்டல் உரிமையாளரிடம் விசாரணை நடைபெற்று வருகிறது.
இந்த சம்பவத்தைத் தொடர்ந்து டெல்லி அரசு நகரம் முழுவதும் ஹோட்டல்கள் மற்றும் தங்கும் விடுதிகளில் தீயணைப்பு பாதுகாப்பு விதிமுறைகள் முறையாக பின்பற்றப்படுகிறதா என்பதை ஆய்வு செய்ய சிறப்பு நடவடிக்கைகளை அறிவித்துள்ளது. டெல்லியின் சமீபகால வரலாற்றில் மிக மோசமான தீ விபத்துகளில் ஒன்றாக இந்த சம்பவம் பதிவாகியுள்ளது.