ஈரான் மற்றும் அமெரிக்கா-இஸ்ரேல் இடையேயான போர் உச்சத்தை எட்டியுள்ள நிலையில், சர்வதேச அரசியலை உலுக்கும் ஒரு அதிர்ச்சிகரமான உண்மை வெளிவந்துள்ளது. ஈரானின் தற்போதைய ஆட்சி அதிகாரத்தை வீழ்த்திவிட்டு, அந்நாட்டின் முன்னாள் தீவிரப்போக்குடைய அதிபரான மஹ்மூத் அஹ்மதிநெஜாத்தை (Mahmoud Ahmadinejad) புதிய தலைவராக அமர வைக்க அமெரிக்காவும் இஸ்ரேலும் ரகசியமாக திட்டமிட்டதாக ‘தி நியூயார்க் டைம்ஸ்’ (The New York Times) பத்திரிகை செய்தி வெளியிட்டுள்ளது.
ஈரான் அதிபர் நாற்காலியில் அஹ்மதிநெஜாத்? அமெரிக்கா – இஸ்ரேல் தீட்டிய ரகசிய ‘மாஸ்டர் பிளான்’ அம்பலம்!
ஈரான் மற்றும் அமெரிக்கா-இஸ்ரேல் இடையேயான போர் உச்சத்தை எட்டியுள்ள நிலையில், சர்வதேச அரசியலை உலுக்கும் ஒரு அதிர்ச்சிகரமான உண்மை வெளிவந்துள்ளது. ஈரானின் தற்போதைய ஆட்சி அதிகாரத்தை வீழ்த்திவிட்டு, அந்நாட்டின் முன்னாள் தீவிரப்போக்குடைய அதிபரான மஹ்மூத் அஹ்மதிநெஜாத்தை (Mahmoud Ahmadinejad) புதிய தலைவராக அமர வைக்க அமெரிக்காவும் இஸ்ரேலும் ரகசியமாக திட்டமிட்டதாக ‘தி நியூயார்க் டைம்ஸ்’ (The New York Times) பத்திரிகை செய்தி வெளியிட்டுள்ளது.
டொனால்ட் ட்ரம்பின் ‘வெனிசுலா மாடல்’ திட்டம்
ஈரானின் ஆன்மீகத் தலைவர் அயதுல்லா அலி கமேனி கொல்லப்பட்ட பிறகு, ஈரானை வழிநடத்த “உள்ளுக்குள் இருக்கும் ஒருவரே” சரியான தேர்வாக இருக்க முடியும் என்று அமெரிக்க அதிபர் டொனால்ட் ட்ரம்ப் கருதினார்.
சமீபத்தில் வெனிசுலா அதிபர் நிக்கோலஸ் மதுரோவை அமெரிக்க சிறப்புப் படையினர் கடத்திய பிறகு, அங்கு இடைக்கால அதிபராக டெல்சி ரோட்ரிக்ஸ் நியமிக்கப்பட்டார். இந்த ‘வெனிசுலா மாடல்’ வெற்றியைப் போலவே, ஈரானிலும் அஹ்மதிநெஜாத்தை வைத்து ஆட்சியைத் தன்வசப்படுத்த ட்ரம்ப் திட்டமிட்டதாக அமெரிக்க அதிகாரிகள் தெரிவிக்கின்றனர்.
வியப்பை ஏற்படுத்திய அஹ்மதிநெஜாத்தின் தேர்வு
அஹ்மதிநெஜாத் தனது அதிபர் பதவிக்காலத்தில் (2005-2013) அமெரிக்காவையும் இஸ்ரேலையும் கடுமையாக எதிர்த்தவர். “இஸ்ரேலை உலக வரைபடத்திலிருந்து துடைத்தெறிய வேண்டும்” என்று முழங்கிய ஒருவரை, அமெரிக்காவும் இஸ்ரேலும் ஆதரிக்க முயன்றது சர்வதேச அரங்கில் பெரும் வியப்பை ஏற்படுத்தியுள்ளது.
இருப்பினும், 2019 நேர்காணல் ஒன்றில் ட்ரம்பை “செயல்வீரர் மற்றும் தொழிலதிபர்” என்று பாராட்டிய அஹ்மதிநெஜாத், இரு நாடுகளுக்கும் இடையிலான நீண்ட கால நன்மைகளை கணக்கிட்டு செயல்பட வேண்டும் என்று இணக்கமான போக்கை வெளிப்படுத்தியிருந்தார் என்பது குறிப்பிடத்தக்கது.
திடீரென முறிந்த ரகசிய திட்டம்: இப்போது அஹ்மதிநெஜாத் எங்கே?
அமெரிக்கா மற்றும் இஸ்ரேலின் இந்த அதிரடித் திட்டம் குறித்து அஹ்மதிநெஜாத்திடம் ஆலோசனை நடத்தப்பட்டதாகக் கூறப்படுகிறது. டெஹ்ரானில் வீட்டுக்காவலில் வைக்கப்பட்டிருந்த அவரை மீட்பதற்காக, போரின் முதல் நாளன்று இஸ்ரேல் வான்வழித் தாக்குதலை நடத்தியது.
இந்தத் தாக்குதலில் அஹ்மதிநெஜாத் காயங்களுடன் உயிர் தப்பினார். ஆனால், இந்த வான்வழித் தாக்குதலுக்குப் பிறகு ஆட்சி மாற்றத் திட்டத்தில் தனக்கு உடன்பாடு இல்லை எனக்கூறி அவர் ஒத்துழைப்பதை நிறுத்திக்கொண்டார். தற்போது அவர் எங்கு இருக்கிறார், என்ன நிலையில் இருக்கிறார் என்ற விவரம் யாருக்கும் தெரியவில்லை என நியூயார்க் டைம்ஸ் அறிக்கை கூறுகிறது.