அல்சைமர் உள்ளிட்ட நினைவாற்றல் குறைபாடு நோய்களுக்கு எதிராக மருத்துவ உலகில் புதிய நம்பிக்கை உருவாகியுள்ளது. சமீபத்தில் வெளியான ஆய்வு ஒன்றில், கட்டுப்படுத்தப்பட்ட அளவில் வழங்கப்படும் “காப்பர் தெரபி” (Copper Therapy) மூளையில் தேங்கும் நச்சுப் புரதங்களை குறைக்க உதவக்கூடும் என விஞ்ஞானிகள் கண்டறிந்துள்ளனர். இந்த கண்டுபிடிப்பு எதிர்காலத்தில் அல்சைமர் சிகிச்சையில் முக்கிய திருப்புமுனையாக அமையலாம்.
காப்பர் என்பது மனித உடலுக்குத் தேவையான அத்தியாவசிய தாதுக்களில் ஒன்றாகும். இது நரம்பு செயல்பாடு, மூளை செல்களுக்கிடையேயான தகவல் பரிமாற்றம் மற்றும் பல முக்கிய நொதிகளின் செயல்பாட்டிற்கு உதவுகிறது. ஆனால் காப்பரின் அளவு மிக அதிகமாகவோ அல்லது மிகக் குறைவாகவோ இருந்தால் மூளை செயல்பாடு பாதிக்கப்படலாம் என்று ஆய்வாளர்கள் எச்சரிக்கின்றனர்.
ஆய்வில் பயன்படுத்தப்பட்ட Cu(ATSM) என்ற காப்பர் அடிப்படையிலான சேர்மம், மூளையில் தேங்கும் அமிலாய்டு-பீட்டா (Amyloid-Beta) எனப்படும் நச்சுப் புரதங்களின் அளவை கணிசமாக குறைத்தது. இந்த புரதங்களே அல்சைமர் நோயின் முக்கிய காரணிகளில் ஒன்றாகக் கருதப்படுகின்றன. ஆய்வக எலி மாதிரிகளில் நடத்தப்பட்ட சோதனையில், இந்த சிகிச்சை நச்சுப் புரதங்களை சுமார் 42% வரை குறைத்ததுடன் நினைவாற்றல் மற்றும் கற்றல் திறனையும் மேம்படுத்தியதாக தெரிவிக்கப்பட்டுள்ளது.
விஞ்ஞானிகளின் விளக்கப்படி, அல்சைமர் நோயின்போது மூளையில் இருக்கும் கழிவுகளை வெளியேற்றும் P-glycoprotein (P-gp) என்ற இயற்கை அமைப்பு பலவீனமடைகிறது. இதனால் நச்சுப் புரதங்கள் மூளையிலேயே தேங்கி விடுகின்றன. காப்பர் அடங்கிய Cu(ATSM) மருந்து இந்த அமைப்பை மீண்டும் செயல்படச் செய்து, நச்சுப் புரதங்களை வெளியேற்ற உதவுகிறது.
எனினும், இந்த ஆய்வு இன்னும் ஆரம்ப கட்டத்தில் இருப்பதாக ஆராய்ச்சியாளர்கள் தெரிவிக்கின்றனர். தற்போதைய முடிவுகள் விலங்கு ஆய்வுகளை அடிப்படையாகக் கொண்டவை. மனிதர்களில் இதன் முழுமையான பயன்கள் மற்றும் பாதுகாப்பு குறித்து மேலும் ஆய்வுகள் தேவைப்படுகிறது. எனவே மருத்துவ ஆலோசனை இல்லாமல் காப்பர் சப்ப்ளிமென்ட்களை அதிகமாக எடுத்துக்கொள்வது ஆபத்தானது என்றும் நிபுணர்கள் எச்சரிக்கின்றனர்.
உலகளவில் கோடிக்கணக்கான மக்களை பாதிக்கும் அல்சைமர் நோய்க்கு புதிய சிகிச்சை வழிகளை கண்டுபிடிக்க விஞ்ஞானிகள் தொடர்ந்து முயற்சி செய்து வருகின்றனர். அந்த வரிசையில் காப்பர் தெரபி தொடர்பான இந்த ஆய்வு, எதிர்கால மருத்துவ உலகிற்கு புதிய நம்பிக்கையை வழங்கியுள்ளது.