“என் பணத்தை எல்லாம் சாப்பிட்டார்” – ஃபரா கான் ஜாலி கமெண்ட். தீஸ் மார்கான் படப்பிடிப்பு நினைவுகளை பகிர்ந்த ஃபரா கான்; அக்ஷய் குமாரின் நேர்த்தி குறித்து சுவாரஸ்ய தகவல். பாலிவுட்டின் முன்னணி இயக்குநரும் நடன அமைப்பாளருமான ஃபரா கான், நடிகர் அக்ஷய் குமார் குறித்து பகிர்ந்துள்ள ஒரு சுவாரஸ்ய தகவல் தற்போது சமூக வலைதளங்களில் வைரலாகி வருகிறது. 2010-ஆம் ஆண்டு வெளியான Tees Maar Khan திரைப்படத்தின் படப்பிடிப்பு நாட்களை நினைவுகூர்ந்த ஃபரா கான், அக்ஷய் குமார் தினமும் ஹெலிகாப்டரில் படப்பிடிப்பு தளத்திற்கு வந்ததாக தெரிவித்துள்ளார்.
அக்ஷய் குமார், ஃபரா கான், இயக்குநர் பிரியதர்ஷன் மற்றும் நடிகர் ராஜ்பால் யாதவ் ஆகியோர் சமீபத்தில் ஒரு நிகழ்ச்சியில் கலந்துகொண்டபோது இந்த சம்பவம் குறித்து பேசினர். அப்போது ஃபரா கான் கூறியதாவது, “நாங்கள் மகாராஷ்டிராவின் மால்ஷேஜ் காட் பகுதியில் படப்பிடிப்பு நடத்தினோம். அந்த இடம் மும்பையிலிருந்து பல மணி நேர பயண தூரத்தில் இருந்தது. படக்குழுவினர் அங்கேயே தங்கியிருந்தார்கள். ஆனால் அக்ஷய் மட்டும் தினமும் வீட்டிற்கு சென்று மறுநாள் காலை நேரத்திற்கு சரியாக வந்துவிடுவார்” என்று கூறினார்.
டாக்ஸி போல ஹெலிகாப்டர் பயன்படுத்திய அக்ஷய்
இந்த தகவலைக் கேட்ட பலரும் ஆச்சரியமடைந்த நிலையில், அக்ஷய் குமார் அதற்கான காரணத்தை விளக்கினார். தினமும் ஹெலிகாப்டரில் பயணம் செய்ததால்தான் அவர் நேரத்திற்கு செட்டில் வந்ததாக தெரிவித்தார். இதையடுத்து ஃபரா கான் நகைச்சுவையாக, “என் வாழ்க்கையில் ஹெலிகாப்டரை டாக்ஸி போல பயன்படுத்திய ஒரே நடிகர் இவர்தான். என் பணத்தை எல்லாம் இவர்தான் சாப்பிட்டார்” என்று கூறி அனைவரையும் சிரிக்க வைத்தார்.
அதற்கு பதிலளித்த அக்ஷய் குமார், “அதில் என்ன தவறு? அந்த படத்தின் தயாரிப்பாளர்களில் நானும் ஒருவன்” என்று நகைச்சுவையாக பதிலடி கொடுத்தார். இந்த உரையாடல் தற்போது ரசிகர்களிடையே அதிகம் பகிரப்பட்டு வருகிறது.
தோல்வியில் இருந்து கல்ட் கிளாசிக்காக மாறிய ‘தீஸ் மார்கான்’
2010-ஆம் ஆண்டு வெளியான Tees Maar Khan திரைப்படம் அப்போது விமர்சகர்களால் கடுமையாக விமர்சிக்கப்பட்டது. இருப்பினும் காலப்போக்கில் அந்த படம் ரசிகர்களிடையே தனி வரவேற்பைப் பெற்று கல்ட் கிளாசிக் படமாக மாறியுள்ளது. ஃபரா கான் கூட சமீபத்திய பேட்டிகளில், அந்தப் படத்தின் தோல்வி தனது வாழ்க்கையின் மிகவும் கடினமான காலமாக இருந்ததாக கூறியுள்ளார்.
இருப்பினும், பல ஆண்டுகளுக்குப் பிறகு Tees Maar Khan திரைப்படம் சமூக வலைதளங்களில் மீண்டும் பிரபலமடைந்துள்ள நிலையில், அதன் படப்பிடிப்பு சம்பவங்களும் ரசிகர்களிடையே அதிக கவனத்தை ஈர்த்து வருகின்றன.