தூத்துக்குடி மாவட்டம் மாசார்பட்டி காவல் எல்லைக்கு உட்பட்ட பகுதியில் இயங்கி வரும் தனியார் பட்டாசு ஆலையில், இன்று சனிக்கிழமை மாலை எதிர்பாராத விதமாகப் பயங்கர வெடி விபத்து ஏற்பட்டது. 60-க்கும் மேற்பட்ட அறைகளைக் கொண்ட இந்த ஆலையில், விபத்து நடந்த சமயத்தில் 50-க்கும் மேற்பட்ட தொழிலாளர்கள் பணியில் இருந்தனர். சனிக்கிழமை என்பதால் ஊழியர்களுக்குச் சம்பளம் வழங்கும் பணி நடந்து கொண்டிருந்தபோது, பட்டாசுகள் வைக்கப்பட்டிருந்த ஒரு அறையில் திடீரென வெடி விபத்து நேரிட்டது.
இந்த விபத்தில் ஒரு தொழிலாளி சம்பவ இடத்திலேயே பரிதாபமாக உயிரிழந்தார்; மேலும் 25-க்கும் மேற்பட்டோர் படுகாயமடைந்தனர். தகவலறிந்து விரைந்து வந்த தீயணைப்புத் துறையினர், காயமடைந்தவர்களை மீட்டுச் சாத்தூர் அரசு மருத்துவமனைக்குச் சிகிச்சைக்காக அனுப்பி வைத்தனர். உயிரிழந்தவரின் உடல் பிரேத பரிசோதனைக்கு அனுப்பப்பட்டுள்ள நிலையில், விபத்துக்கான காரணம் குறித்துப் போலீசார் தீவிர விசாரணை நடத்தி வருகின்றனர்.