ஆன்லைன் மருந்து விற்பனைக்கு எதிர்ப்பு தெரிவித்து அகில இந்திய மருந்து வணிகர்கள் சங்கம் சார்பில் அறிவிக்கப்பட்டுள்ள தமிழகம் முழுவதும் மெடிக்கல்கள் கடையடைப்புப் போராட்டம் பொதுமக்களிடையே பெரும் கவனத்தைப் பெற்றுள்ளது.
ஆன்லைன் மருந்து நிறுவனங்கள் எவ்வித கடுமையான கட்டுப்பாடுகளும் இன்றி, மருத்துவர்களின் முறையான பரிந்துரை சீட்டுகள் இல்லாமலேயே ஆன்டிபயாடிக்ஸ் மற்றும் வீரியமிக்க மருந்துகளை விற்பனை செய்வதாகச் சங்கம் குற்றஞ்சாட்டியுள்ளது.
ஆன்லைன் மற்றும் கார்ப்பரேட் நிறுவனங்கள் 20% முதல் 50% வரை தள்ளுபடி வழங்குவதால், பாரம்பரியமாகத் தொழில் செய்யும் சிறு மற்றும் சில்லறை மருந்து விற்பனையாளர்களின் வாழ்வாதாரம் கடுமையாகப் பாதிக்கப்பட்டுள்ளது.
பொதுமக்களுக்கு, குறிப்பாக அவசரத் தேவை உள்ளவர்களுக்கு மருந்துகள் தடையின்றிக் கிடைப்பதை உறுதி செய்யப் பல்வேறு முன்னெச்சரிக்கை நடவடிக்கைகள் எடுக்கப்பட்டுள்ளன:
கடையடைப்பு காரணமாகப் பொதுமக்களுக்குப் பாதிப்பு ஏற்படக் கூடாது என்பதற்காக, அனைத்து அரசு மருத்துவமனைகளிலும் தேவையான அத்தியாவசிய மருந்துகள் மற்றும் உயிர்காக்கும் மருந்துகளைப் போதிய அளவில் கையிருப்பில் வைக்க அரசு உத்தரவிட்டுள்ளது.
கர்ப்பிணிகள், முதியவர்கள் மற்றும் சர்க்கரை நோய், ரத்த அழுத்தம் போன்ற இணை நோய் உள்ளவர்களுக்குத் தேவையான அவசர மருந்து சேவைகள் எவ்வித தடையுமின்றி கிடைக்க வழிவகை செய்யப்பட்டுள்ளது. இந்த ஸ்ட்ரைக் அறிவிக்கப்பட்டிருந்தாலும், மருத்துவமனைகளுடன் இணைந்து செயல்படும் மருந்து கடைகள் ஜன் ஔஷதி மற்றும் அம்ரித் மருந்தகங்கள் வழக்கம்போல் திறந்திருக்கும் என அறிவிக்கப்பட்டுள்ளது. மேலும், சில மாநில சில்லறை விற்பனையாளர்கள் சங்கங்கள் பொதுமக்களின் நலன் கருதி இந்த வேலைநிறுத்தத்தில் பங்கேற்கப் போவதில்லை என்றும் தெரிவித்துள்ளனர்.
எனவே, பொதுமக்கள் அவசரத் தேவைகளுக்கான மருந்துகளை முன்கூட்டியே வாங்கி வைத்துக் கொள்ளுமாறும் அல்லது அரசு மற்றும் மருத்துவமனை மருந்தகங்களை அணுகுமாறும் அறிவுறுத்தப்படுகிறார்கள்.