Meta-வில் பரபரப்பு! ஊழியர்களின் Mouse, Keyboard கண்காணிப்பு திட்டம் திடீர் நிறுத்தம். உலகின் மிகப்பெரிய சமூக ஊடக நிறுவனங்களில் ஒன்றான Meta, தனது ஊழியர்களின் கணினி பயன்பாட்டை கண்காணிக்கும் சர்ச்சைக்குரிய திட்டத்தை தற்காலிகமாக நிறுத்தியுள்ளது. AI மாடல்களுக்கு பயிற்சி அளிக்கும் நோக்கில் அறிமுகப்படுத்தப்பட்ட இந்த திட்டம், தரவு பாதுகாப்பு குறித்த கடும் கேள்விகளை எழுப்பிய நிலையில் தற்போது விசாரணைக்கு உட்படுத்தப்பட்டுள்ளது.
Meta நிறுவனம் கடந்த ஏப்ரல் மாதம் “Model Capability Initiative (MCI)” என்ற திட்டத்தை அறிமுகப்படுத்தியது. இதன் மூலம் அமெரிக்காவில் பணிபுரியும் ஊழியர்களின் Mouse நகர்வுகள், Click-கள், Keyboard Keystrokes உள்ளிட்ட கணினி பயன்பாட்டு தகவல்கள் சேகரிக்கப்பட்டன. இந்த தரவுகள் AI மாடல்களை மேலும் புத்திசாலித்தனமாக மாற்ற பயன்படுத்தப்படுவதாக நிறுவனம் தெரிவித்திருந்தது.
ஆனால் சமீபத்தில், இந்த திட்டத்தின் கீழ் சேகரிக்கப்பட்ட சில முக்கிய தரவுகள் Meta நிறுவனத்தின் பல ஊழியர்களுக்கும் அணுகக்கூடிய நிலையில் இருந்தது வெளிச்சத்துக்கு வந்தது. தனிப்பட்ட உரையாடல்கள், செயல்திறன் மதிப்பீட்டு தகவல்கள் மற்றும் பிற ரகசிய தகவல்கள் பாதுகாப்பின்றி கிடைத்ததாக தகவல்கள் வெளியாகின. இதையடுத்து நிறுவனத்துக்குள் கடும் அதிருப்தி ஏற்பட்டது.
இந்த விவகாரம் குறித்து Meta நிறுவனம் விளக்கம் அளித்துள்ளது. “தரவுகள் தவறாக பயன்படுத்தப்பட்டதாக எந்த ஆதாரமும் தற்போது இல்லை. இருப்பினும் பாதுகாப்பு சிக்கல்கள் குறித்து முழுமையான விசாரணை நடத்தும் வரை திட்டத்தை தற்காலிகமாக நிறுத்துகிறோம்” என்று Meta செய்தித் தொடர்பாளர் தெரிவித்துள்ளார்.
இந்த திட்டம் தொடங்கிய நாளிலிருந்தே Meta ஊழியர்கள் எதிர்ப்பு தெரிவித்து வந்தனர். ஆயிரக்கணக்கான ஊழியர்கள் தனியுரிமை மீறல் குறித்து கவலை தெரிவித்திருந்த நிலையில், ஐரோப்பிய ஒன்றியத்தின் தனியுரிமை சட்டங்களுடனும் இந்த திட்டம் முரண்படலாம் என்ற எச்சரிக்கைகளும் எழுந்திருந்தன.
செயற்கை நுண்ணறிவு துறையில் முன்னிலை பெற Meta பல பில்லியன் டாலர்கள் முதலீடு செய்து வரும் நிலையில், இந்த தரவு கசிவு விவகாரம் நிறுவனத்தின் AI முயற்சிகளுக்கு புதிய சவாலாக மாறியுள்ளது. AI வளர்ச்சிக்கும், ஊழியர்களின் தனியுரிமைக்கும் இடையே சமநிலையை எப்படி பேணப்போகிறது என்பதே தற்போது அனைவரின் கவனத்தையும் ஈர்த்துள்ளது.