Skip to content
Home » பழநி முருகன் கோயிலுக்குள் இந்து அல்லாதவர்கள் நுழையத்தடை…

பழநி முருகன் கோயிலுக்குள் இந்து அல்லாதவர்கள் நுழையத்தடை…

  • by Senthil

திண்டுக்கல் மாவட்டம், பழநியைச் சேர்ந்த செந்தில்குமார் என்பவர், சென்னை உயர்நீதிமன்ற மதுரை கிளையில் மனு ஒன்றை தாக்கல் செய்திருந்தார். அவரது மனுவில் ‘பழநியில் உள்ள மிகவும் பிரசித்தி பெற்ற முருகன் கோயிலில் தினந்தோறும் பல்லாயிரக்கணக்கான பக்தர்கள் வந்து செல்கின்றனர்.

பழநி தண்டாயுதபாணி சுவாமி கோயில் இந்து அறநிலையத்துறையின் கீழ் பராமரிக்கப்பட்டு வருகிறது. இந்து அறநிலையத்துறை ஆலய நுழைவு விதி 1947-ம் ஆண்டு இயற்றப்பட்ட சட்டத்தில் இந்து அல்லாத எந்த ஒரு சமயத்தினரும் இந்து கோயிலுக்குள் நுழைவதைத் தடுக்கின்றது. இந்து அல்லாத எவரும் கோயிலுக்குள் நுழையக்கூடாது என தடுக்கும் வண்ணம் இந்த சட்டம் அப்போது நிறைவேற்றப்பட்டது.

இவ்வாறு உள்ள சூழலில் பழநி தேவஸ்தான முருகன் கோயிலில் இந்து அல்லாத நபர்கள் திருக்கோயிலுக்குள் நுழைய தடை என்ற அறிவிப்பு பலகை தற்போதைய செயல் அலுவலரால் நீக்கப்பட்டுள்ளது. இது இந்து மதம் சார்ந்த மக்களின் நம்பிக்கைகளைப் புண்படுத்தும் வகையில் உள்ளது.

இது தேவையற்ற சர்ச்சைகளை உருவாக்கும் வகையில் உள்ளது. இந்த நிலையில், இந்து அல்லாத சிலர் கோயிலுக்குள் நுழைய முயற்சி செய்துள்ளனர். அதன் பிறகு இந்த பதாகைகள் நீக்கப்பட்டுள்ளன.

எனவே, பழநி தேவஸ்தானத்திற்கு உட்பட்ட பழநி முருகன் மற்றும் உப கோயிலுக்குள் இந்து அல்லாதவர்கள் நுழைய தடை விதிக்க வேண்டும். இந்து அல்லாதவர்கள் கோயிலுக்குள் நுழைய தடை என்ற பதாகையை மீண்டும் வைக்க வேண்டும் என மனு தாக்கல் செய்திருந்தார்.

இந்த வழக்கு  நீதிபதி ஸ்ரீமதி முன் விசாரணைக்கு வந்தது. அப்போது இந்து அல்லாதவர் கோயிலுக்குள் நுழைய தடை என்ற பதாகை மீண்டும் வைக்க வேண்டும் என்று தெரிவித்து, இந்து அறநிலையத்துறை சார்பில் பதில் மனு தாக்கல் செய்ய ஏற்கெனவே  உத்தரவு பிறப்பித்திருந்தார்.

இந்த வழக்கில் மனுதாரர் தரப்பில் மூத்த வழக்கறிஞர் அனந்த பத்மநாபன் மற்றும் அருண் சுவாமிநாதன் ஆகியோர் ஆஜராகி வாதம் செய்தனர். பின்னர் இந்த  வழக்கு தீர்ப்புக்காக ஒத்தி வைக்கப்பட்டிருந்தது.

இந்நிலையில் இந்த வழக்கில் இன்று தீர்ப்பு வழங்கிய நீதிபதி ஸ்ரீமதி, இந்து அல்லாதவர்கள் கோயிலின் கொடிமரம் தாண்டி உள்ளே அனுமதிக்கக்கூடாது என்றும், இந்து அல்லாதவர்கள் மற்றும் இந்து கடவுள் மீது நம்பிக்கை இல்லாதவர்கள் கோயிலுக்குள் நுழைய தடை விதிக்கப்பட்டுள்ளது என்ற பதாகையை கோயிலில் பல்வேறு இடங்களில் வைக்க வேண்டும்.

மேலும்,  மாற்று மதத்தைச் சார்ந்தவர்கள் கோயிலுக்குள் சாமி தரிசனம் செய்ய விரும்பினால் கோயிலில் இதற்காக ஒரு பதிவேடு வைக்க வேண்டும். அந்த பதிவேட்டில் இந்த சுவாமியின் மீது நம்பிக்கை கொண்டு   தரிசனம் செய்ய வருகிறேன் என உத்திரவாதம் உறுதிமொழி எழுதிக் கொடுத்தபின்பு கோயிலுக்குள் அனுமதிக்கலாம் என்று உத்தரவிட்டுள்ளார்.

Leave a Reply

Your email address will not be published. Required fields are marked *

error: Content is protected !!