சென்னை : கடந்த ஜூலை 3-ஆம் தேதி திரையரங்குகளில் வெளியான ‘கட்டா குஸ்தி 2’ திரைப்படம், ரசிகர்களிடையே பெரும் வரவேற்பைப் பெற்று திரையரங்குகளில் வெற்றிகரமாக ஓடிக்கொண்டிருக்கிறது. இப்படத்தின் பிரம்மாண்ட வெற்றியைத் தொடர்ந்து, படத்தின் இயக்குநர் செல்லா அய்யாவின் உழைப்பைப் பாராட்டும் விதமாக, நடிகர் விஷ்ணு விஷால் அவருக்குப் புதிய Toyota Innova Hycross காரைப் பரிசாக வழங்கி தனது மகிழ்ச்சியை வெளிப்படுத்தியுள்ளார்.
விஷ்ணு விஷால் தனது கைகளால் காரின் சாவியை இயக்குநர் செல்லா அய்யாவிடம் ஒப்படைக்கும் புகைப்படங்கள் மற்றும் நிகழ்வின் வீடியோ காட்சிகள் தற்போது சமூக வலைதளங்களில் வைரலாகி வருகின்றன. ‘கட்டா குஸ்தி 2’ திரைப்படம் உலகளவில் ரூ. 50 கோடி வசூலை நோக்கி வேகமாக முன்னேறி வருவதாகவும், இந்த வெற்றிக்கு இயக்குநரின் அர்ப்பணிப்பு மிகுந்த பங்களிப்பே காரணம் எனவும் விஷ்ணு விஷால் நெகிழ்ச்சியுடன் தெரிவித்துள்ளார்.
இயக்குநருக்குப் பரிசளிக்கப்பட்ட இந்த ‘Toyota Innova Hycross’ கார், இந்தியாவில் மிகவும் பிரபலமான பிரீமியம் MPV ரகத்தைச் சேர்ந்தது. இதன் சிறப்பம்சங்கள் பற்றி பார்ப்போம்.
பெர்ஃபாமன்ஸ்: 2.0 லிட்டர் பெட்ரோல் மற்றும் ஸ்ட்ராங் ஹைபிரிட் என்ஜின் தேர்வுகளில் கிடைக்கிறது. ஹைபிரிட் வேரியண்ட் லிட்டருக்கு சுமார் 23 கி.மீ வரை மைலேஜ் வழங்கக்கூடியது.
நவீன வசதிகள்: 10-இன்ச் இன்ஃபோடெயின்மென்ட் திரை, பனோரமிக் சன்ரூஃப், வயர்லெஸ் சார்ஜிங் மற்றும் டூயல்-ஜோன் கிளைமேட் கண்ட்ரோல் போன்ற பிரீமியம் அம்சங்களைக் கொண்டது.
பாதுகாப்பு: இதில் 360° கேமரா, ஆறு ஏர்பேக்குகள் மற்றும் Toyota Safety Sense (ADAS) உள்ளிட்ட உயர்தரப் பாதுகாப்பு அம்சங்கள் உள்ளன.
விலை: இந்தியாவில் இதன் எக்ஸ்-ஷோரூம் விலை சுமார் ரூ. 18.70 லட்சம் முதல் ரூ. 31.84 லட்சம் வரை நிர்ணயம் செய்யப்பட்டுள்ளது.
குடும்பப் பயணங்களுக்கும், நீண்ட தூரப் பயணங்களுக்கும் மிகவும் வசதியான காராகக் கருதப்படும் இந்த சொகுசு வாகனத்தைப் பரிசாகப் பெற்ற இயக்குநர் செல்லா அய்யா, நடிகர் விஷ்ணு விஷாலுக்கு தனது நன்றிகளைத் தெரிவித்துக் கொண்டார்.