தூத்துக்குடி மாவட்டம் புதுக்கோட்டை சந்தோஷ் நகரைச் சேர்ந்தவர் மாரிமுத்து (44). கிராம நிர்வாக அலுவலராக (VAO) பணியாற்றி வரும் இவரது மனைவி கவுசல்யா திருநெல்வேலியில் பேராசிரியையாகப் பணியாற்றி வருகிறார். இவர்கள் கடந்த 14-ம் தேதி வெளியூர் சென்றிருந்த சமயத்தில், மர்ம நபர்கள் வீட்டின் கதவை உடைத்து பீரோவில் இருந்த 12 சவரன் தங்க நகைகளைத் திருடிச் சென்றனர். இதன் மதிப்பு சுமார் 15 லட்சம் ரூபாய் ஆகும்.
இதுகுறித்து மாரிமுத்து அளித்த புகாரின் பேரில், புதுக்கோட்டை போலீசார் வழக்குப் பதிவு செய்து தீவிர விசாரணை மேற்கொண்டனர். அந்தப் பகுதியில் இருந்த சிசிடிவி (CCTV) காட்சிகளை ஆய்வு செய்தபோது, வியாபாரிகள் போல் நோட்டமிட்டுத் திருட்டில் ஈடுபட்ட மர்ம நபர்கள் குறித்துத் துப்பு துலங்கியது. அவர்கள் கர்நாடக மாநிலம் உத்தரகள்ளியைச் சேர்ந்த அர்ஜூன் (56) மற்றும் அவரது மகன் மோகன்குமார் (22) என்பது தெரியவந்தது.
சைபர் கிரைம் உதவியுடன் அவர்களது செல்போன் சிக்னலை ஆய்வு செய்தபோது, அவர்கள் பெங்களூருவில் பதுங்கியிருப்பது கண்டறியப்பட்டது. இதையடுத்து பெங்களூரு விரைந்த தனிப்படை போலீசார், தந்தை மற்றும் மகன் ஆகிய இருவரையும் சுற்றி வளைத்துக் கைது செய்தனர். அவர்களிடம் இருந்து திருடப்பட்ட நகைகளை மீட்கும் நடவடிக்கை எடுக்கப்பட்டு வருகிறது.