டில்லி: பிரதான் மந்திரி உஜ்ஜவலா யோஜனா (PMUY) திட்டத்தின் கீழ் ஏழை எளிய குடும்பங்களுக்கு வழங்கப்படும் மானிய விலை எல்பிஜி (LPG) சிலிண்டர்களின் எண்ணிக்கையில் மத்திய அரசு அதிரடியான ஒரு கட்டுப்பாட்டைக் கொண்டுவந்துள்ளது.
இதுவரை ஒரு ஆண்டிற்கு 9 சிலிண்டர்கள் வரை வழங்கப்பட்டு வந்த மானிய வரம்பு, இனி 4 சிலிண்டர்களாகக் குறைக்கப்படும் என்று மத்திய அரசு இன்று (செவ்வாய்க்கிழமை, ஜூன் 9, 2026) அதிகாரப்பூர்வமாகத் தெளிவுபடுத்தியுள்ளது. ஏழை மக்களுக்கான திட்டத்தில் நடந்த ஒரு மாபெரும் முறைகேட்டைத் தடுப்பதற்காகவே இந்த அதிரடி நடவடிக்கை எடுக்கப்பட்டுள்ளது.
உஜ்ஜவலா திட்டத்தின் கீழ் கிராமப்புற ஏழை மக்கள் வாங்கும் சிலிண்டர்களுக்கு அரசு பெரிய தொகையை மானியமாக (Subsidy) வழங்குகிறது. சில சமூக விரோதிகளும், ஏஜென்சி புரோக்கர்களும் ஏழை மக்களின் பெயரில் இருக்கும் 9 சிலிண்டர் வரம்பைப் பயன்படுத்தி, போலி முன்பதிவுகள் மூலம் மானிய விலை சிலிண்டர்களை வாங்கி, அவற்றை ஹோட்டல்கள், டீக்கடைகள் மற்றும் வணிக ரீதியான பயன்பாடுகளுக்குக் கள்ளச்சந்தையில் (Black Market) கூடுதல் விலைக்கு விற்று வந்தது கண்டுபிடிக்கப்பட்டுள்ளது.
இதன் காரணமாக, உண்மையான ஏழை மக்களுக்குச் செல்ல வேண்டிய அரசு மானியம் தவறான நபர்களின் கைகளுக்குச் சென்று, திட்டத்தின் நோக்கத்தையே பாழாக்கியது. இந்த மானியக் கசிவைத் தடுக்கவே, இனி ஒரு குடும்பத்திற்கு ஆண்டிற்கு 4 சிலிண்டர்களுக்கு மேல் மானியம் தரக்கூடாது என அரசு முட்டுக்கட்டை போட்டுள்ளது.
இந்த அறிவிப்பால் சாதாரண மக்களுக்குச் சிலிண்டர் கிடைப்பதில் ஏதேனும் தட்டுப்பாடு வருமா என்ற குழப்பத்திற்கு அரசு தெளிவான விளக்கம் அளித்துள்ளது. “உஜ்ஜவலா திட்டப் பயனாளிகள் ஒரு ஆண்டிற்கு எத்தனை சிலிண்டர்கள் வேண்டுமானாலும் தொடர்ந்து வாங்கிக் கொள்ளலாம். எண்ணிக்கையில் எந்தத் தடையும் இல்லை. ஆனால், உங்களது வங்கி கணக்கிற்கு நேரடியாக வரும் (DBT) மானியத் தொகை, நீங்கள் வாங்கும் முதல் 4 சிலிண்டர்களுக்கு மட்டுமே வரும். 5-வது சிலிண்டரில் இருந்து நீங்கள் சந்தை விலைக்கு தான் வாங்க வேண்டும்” என விளக்கம் அளிக்கப்பட்டுள்ளது.
மத்திய அரசின் புள்ளிவிவரங்களின்படி, இந்தியாவின் பெரும்பாலான உஜ்ஜவலா நுகர்வோர்கள் சராசரியாக ஒரு ஆண்டிற்குப் பயன்படுத்தும் சிலிண்டர்களின் எண்ணிக்கையே 4 தான். ஏழை எளிய குடும்பங்கள் விறகு அடுப்புகளையும் சேர்த்துப் பயன்படுத்துவதால், ஒரு சிலிண்டர் 3 மாதங்கள் வரை நீடிக்கிறது.
எனவே, இந்த 4 சிலிண்டர் வரம்பு கட்டுப்பாடு என்பது 90% உண்மையான ஏழை மக்களைப் பாதிக்காது என்றும், சிலிண்டர்களைக் கடத்தி லாபம் பார்த்த கள்ளச்சந்தை கும்பலுக்கு மட்டுமே இது மிகப்பெரிய அடியாக இருக்கும் என்றும் அதிகாரிகள் தரப்பில் விளக்கமளிக்கப்பட்டுள்ளது.