வேலைவாய்ப்பு சந்தையில் பணிநீக்கங்கள் அதிகரித்து வரும் நிலையில், வீட்டிலிருந்தே (Remote Job) பணியாற்றி தனது ஆண்டு சம்பளத்தை ₹10 லட்சத்தில் இருந்து ₹80 லட்சமாக உயர்த்திய இளம் பெண்ணின் அனுபவம் சமூக வலைதளங்களில் பெரும் கவனத்தை ஈர்த்துள்ளது. இந்த வெற்றிக்குப் பின்னால் இருந்த முக்கிய காரணம் செயற்கை நுண்ணறிவு (AI) கருவிகளை புத்திசாலித்தனமாக பயன்படுத்தியதுதான் என அவர் கூறியுள்ளார்.
ரிது மவுர்யா என்ற இளம் தொழில்நுட்ப நிபுணர், வழக்கமான முறையில் வேலைக்கு விண்ணப்பிப்பதை விட வேறுபட்ட அணுகுமுறையை தேர்வு செய்தார். முதலில் தன்னுடைய கனவு நிறுவனங்களை பட்டியலிட்டு, அவற்றின் வேலைவாய்ப்பு அறிவிப்புகள் மற்றும் தேவையான திறன்களை ஆராய்ந்தார். பின்னர் ChatGPT போன்ற AI கருவிகளை பயன்படுத்தி அந்த வேலைகளுக்கு பொருத்தமான திட்ட யோசனைகளை உருவாக்கினார்.
அதன் பிறகு, AI உதவியுடன் அந்த திட்டங்களை உருவாக்கி, தொடர்ந்து மேம்படுத்தினார். முதல் முயற்சியே சிறந்ததாக இருக்காது என்பதால், பலமுறை திருத்தி தரத்தை உயர்த்தியதாக அவர் தெரிவித்துள்ளார். இதன் மூலம் தனது திறமையை நேரடியாக நிரூபிக்கும் போர்ட்ஃபோலியோவை உருவாக்க முடிந்தது.
மற்றொரு முக்கியமான நடவடிக்கையாக, ரிது தனது திட்டங்களை நேரடியாக நிறுவனங்களின் Hiring Managers-க்கு அனுப்பினார். சாதாரண ரெஸ்யூமே அனுப்புவதை விட, ஏற்கனவே செய்த பணிகளை காட்டுவது அதிக தாக்கத்தை ஏற்படுத்தியதாக அவர் கூறுகிறார். இதனால் பல நிறுவனங்களின் கவனம் அவரை நோக்கி திரும்பியது.
LinkedIn தளத்தையும் அவர் திறமையாக பயன்படுத்தினார். தனது திட்டங்கள், கற்றல் அனுபவங்கள் மற்றும் தொழில்நுட்ப திறன்கள் குறித்து தொடர்ந்து பதிவுகள் வெளியிட்டதன் மூலம் தொழில்துறையில் அதிக நம்பகத்தன்மையை பெற்றார். இதுவே அதிக சம்பளமுள்ள தொலைதூர வேலை வாய்ப்புகளை பெற உதவியதாக அவர் தெரிவித்துள்ளார்.
AI வளர்ச்சி வேலைகளை பறிக்கும் என்ற அச்சம் உலகம் முழுவதும் பேசப்பட்டு வரும் நிலையில், இந்த அனுபவம் ஒரு வேறு கோணத்தை காட்டுகிறது. AI-யை போட்டியாளராக பார்க்காமல், அதை ஒரு கருவியாக பயன்படுத்தினால் தொழில் வளர்ச்சிக்கான வாய்ப்புகள் பல மடங்கு அதிகரிக்கலாம் என்பதையே ரிதுவின் வெற்றி கதை எடுத்துக்காட்டுகிறது.
இன்றைய வேலைவாய்ப்பு சந்தையில் வெறும் பட்டப்படிப்பு அல்லது அனுபவம் மட்டுமல்ல, தங்களது திறமைகளை செயல்பாட்டு திட்டங்கள் மூலம் நிரூபிக்கும் திறனும் முக்கியமாக மாறி வருகிறது. AI, தனிப்பட்ட பிராஜெக்ட்கள் மற்றும் தொழில்முறை நெட்வொர்க்கிங் ஆகியவற்றை சரியாக பயன்படுத்துபவர்களுக்கு உலகளாவிய வேலை வாய்ப்புகள் திறக்கப்படுகின்றன என்பதற்கு இந்த சம்பவம் ஒரு சிறந்த உதாரணமாக பார்க்கப்படுகிறது.