டில்லி மதுபான கொள்கை வழக்கில் அமலாக்கத் துறையின் 3வது சம்மனையும் முதல்வர் அரவிந்த் கெஜ்ரிவால் மீண்டும் புறக்கணித்தார். அமலாக்கத் துறையின் சம்மன் சட்டவிரோதமானது, அரவிந்த் கெஜ்ரிவாலை கைது செய்வது மட்டுமே அதன் நோக்கம்” என்று அக்கட்சி சாடியுள்ளது.
இது தொடர்பாக ஆம் ஆம்தி கட்சி கூறியதாவது:“எங்கள் கட்சியின் தேசிய ஒருங்கிணைப்பாளர் அரவிந்த் கெஜ்ரிவால் விசாரணை அமைப்பின் நடவடிக்கைகளுக்கு ஒத்துழைக்கத் தயாராக இருக்கிறார். ஆனால், தேர்தலுக்கு முன்பாக அவருக்கு நோட்டீஸ் அனுப்பப்பட்டதற்கு காரணம் அவரை தேர்தல் பிரச்சாரத்தில் ஈடுபட விடாமல் தடுக்க வேண்டும் என்பதே. கெஜ்ரிவாலை கைது செய்வது மட்டுமே அமலாக்கத் துறையின் நோக்கமாக இருக்கிறது” என்று தெரிவிக்கப்பட்டுள்ளது.
அமலாக்கத் துறையால் முதல் சம்மன் அனுப்பப்பட்டதில் இருந்தே, விசாரணைக்கு பின்னர் அரவிந்த் கெஜ்ரிவால் கைது செய்யப்படலாம் என்று தகவல்கள் நிலவி வருகின்றன. ஆம் ஆத்மி கட்சியின் தலைவர்கள் பலர் இதனை சுட்டிக்காட்டியே அறிக்கைகளை வெளியிடுகின்றனர் என்பது கவனிக்கத்தக்கது.
முன்னதாக இந்த வழக்கு தொடர்பாக டில்லி முதல்வர் கெஜ்ரிவாலிடம் கடந்த ஏப்ரல் மாதம் சிபிஐ விசாரணை நடத்தி இருந்தது. ஆனால் அவர் மீது குற்றம்சாட்டப்படவில்லை என்பது குறிப்பிடத்தக்கது.