செங்கல்பட்டு – காஞ்சிபுரம் – அரக்கோணம் இடையிலான 68 கிலோமீட்டர் தூர ஒற்றை ரயில் பாதையை, இருவழித்தடமாக (Doubling Project) மாற்றுவதற்கான திட்டத்திற்கு மத்திய ரயில்வே அமைச்சகம் தற்போது அதிகாரப்பூர்வமாக ஒப்புதல் அளித்துள்ளது.
தென்னக ரயில்வேயின் இத்திட்டத்திற்கு ₹993 கோடி நிதியை மத்திய அரசு ஒதுக்கியுள்ளது. சென்னை புறநகர் வட்டார ரயில் வலைப்பின்னலில் (Circular Rail Network) இந்த 68 கி.மீ தடம் மிக முக்கியப் பங்கு வகிக்கிறது. தற்போது ஒற்றை வழித்தடமாக இருப்பதால், ரயில்கள் மாறிச் செல்ல நீண்ட நேரம் காத்திருக்க வேண்டியுள்ளது. இந்த இருவழித்தடப் பணிகள் நிறைவடைந்தால், ரயில்களின் காத்திருப்பு நேரம் குறைந்து, புறநகர் மின்சார ரயில்களின் எண்ணிக்கையும், வேகமும் அதிகரிக்கும்.
இந்த வழித்தடம் ஸ்ரீபெரும்புதூர், ஒரகடம், இருங்காட்டுகோட்டை, மஹிந்திரா வேர்ல்ட் சிட்டி போன்ற முக்கிய தொழிற்பேட்டைகளை இணைப்பதால், சிமெண்ட், ஆட்டோமொபைல் மற்றும் எஃகு போன்ற சரக்கு போக்குவரத்துக்கு பெரும் உதவியாக இருக்கும்.
காஞ்சிபுரம் அருகே அமையவிருக்கும் முன்மொழியப்பட்ட பரந்தூர் புதிய விமான நிலையத்திற்கு மிக அருகில் இந்த வழித்தடம் அமைவதால், வருங்காலத்தில் இதற்கான முக்கியத்துவம் இன்னும் பல மடங்கு அதிகரிக்கும் என மத்திய ரயில்வே அமைச்சர் அஸ்வினி வைஷ்ணவ் தெரிவித்துள்ளார்.
இந்த இருவழித்தட ஒப்புதல் மூலம் சென்னை கடற்கரை, தாம்பரம், செங்கல்பட்டு, காஞ்சிபுரம் மற்றும் அரக்கோணம் ஆகிய பகுதிகளை இணைக்கும் நேரடி புறநகர் ரயில் சேவைகள் தடையின்றி சீராக இயங்க வழிவகை செய்யப்பட்டுள்ளது. இதனால் சென்னை மற்றும் அதன் புறநகர் பகுதி பயணிகள் மிகுந்த மகிழ்ச்சி அடைந்துள்ளனர்.