ஈரோடு: கோபிச்செட்டிப்பாளையம் அருகே சாலையோரம் நின்று கொண்டிருந்த 100 நாள் வேலைத் திட்டப் பணியாளர்கள் மீது கட்டுப்பாட்டை இழந்த கார் மோதியதில் 17 பேர் காயமடைந்தனர்.
ஈரோடு மாவட்டம், கோபிச்செட்டிப்பாளையம் சுற்றுவட்டார பகுதியைச் சேர்ந்த மகாத்மா காந்தி தேசிய ஊரக வேலை உறுதித் திட்டப் பணியாளர்கள், பணிக்காக சாலையோரம் நின்று கொண்டிருந்தனர். அப்போது, அந்த வழியாக வேகமாக வந்த கார் ஒன்று, எதிரே வந்த இருசக்கர வாகனத்திற்கு வழிவிடுவதற்காக திடீரென திருப்பப்பட்டுள்ளது. இதில் ஓட்டுநரின் கட்டுப்பாட்டை இழந்த கார், சாலையோரம் நின்றிருந்த பணியாளர்கள் கூட்டத்திற்குள் புகுந்து பயங்கரமாக மோதியது. இந்த கோர விபத்தில் 17 பணியாளர்கள் படுகாயமடைந்தனர்.
இந்த விபத்து குறித்து தகவலறிந்து விரைந்து வந்த அக்கம்பக்கத்தினரும் மீட்புக் குழுவினரும், காயமடைந்த அனைவரையும் மீட்டு 108 ஆம்புலன்ஸ் மூலம் சிகிச்சைக்காக கோபிச்செட்டிப்பாளையம் அரசு மருத்துவமனைக்கு அனுப்பி வைத்தனர். அங்கு அவர்களுக்கு தீவிர சிகிச்சை அளிக்கப்பட்டு வருகிறது. இந்த சம்பவம் குறித்து கோபிச்செட்டிப்பாளையம் காவல்துறையினர் வழக்குப்பதிவு செய்து தீவிர விசாரணை மேற்கொண்டு வருகின்றனர்.