விசிக தலைவர் திருமாவளவன், தவெக தலைவர் விஜய் மீது கடுமையான விமர்சனங்களை முன்வைத்துள்ளார். “நீங்கள் இன்னும் தேர்தலுக்கே வரவில்லை. அதற்குள் இவ்வளவு பயந்தால் எப்படி? எதிர்காலத்தில் எப்படி அரசியல் செய்யப்போகிறீர்கள்?” என்று கேள்வி எழுப்பியுள்ளார். விஜய் பாஜகவையோ மோடி அரசையோ வெளிப்படையாக எதிர்க்க தயாராக இல்லை என்றும், அச்சம் காரணமாக அவர்கள் கூட்டணியில் இணைந்தால் அரசியல் எதிர்காலம் கேள்விக்குறியாகும் என்றும் எச்சரித்துள்ளார்.
திருமாவளவன் மேலும் கூறுகையில், “தேசிய ஜனநாயகக் கூட்டணி ஆட்சி மலரும் என்றால் அதற்குப் பொருள் என்ன? பாஜக ஆட்சி மலரும் என்றுதானே பொருள்” என்று கேள்வி எழுப்பினார். அதிமுக இப்போது பலவீனமடைந்து விட்டதால் தான் ‘தேசிய ஜனநாயக கூட்டணி’ என்ற அளவுக்கு பேசப்படுகிறது என்றும் விமர்சித்தார். விஜய் பாஜகவுடன் கூட்டணி வைப்பது என்பது அவரது அரசியல் எதிர்காலத்தை அழித்துவிடும் என்று எச்சரித்தார்.
‘ஜனநாயகன்’ படத்தின் சென்சார் விவகாரத்தில் பாஜகவின் நெருக்கடி உள்ளதா என்பதை விஜய்தான் தெளிவுபடுத்த வேண்டும் என்று திருமாவளவன் வலியுறுத்தினார். பாஜகவின் அழுத்தத்தால் விஜய் தயங்குகிறார் என்றும், அவர் பாஜகவை வெளிப்படையாக எதிர்க்க தயாராக இல்லை என்றும் குற்றம்சாட்டினார். “ஒன்று மட்டும் தெளிவாகத் தெரிகிறது.
பாஜக, மோடி அரசை வெளிப்படையாக எதிர்க்க விஜய் தயாராக இல்லை.. அச்சப்படுகிறார்” என்று திருமாவளவன் கூறினார்.இந்த விமர்சனங்கள் தமிழக அரசியல் வட்டாரத்தில் பெரும் கவனத்தை ஈர்த்துள்ளன. 2026 சட்டமன்றத் தேர்தலுக்கு முன்பு தவெகவின் கூட்டணி முடிவுகள் குறித்து ஏற்கனவே பல்வேறு ஊகங்கள் எழுந்து வரும் நிலையில், திருமாவளவனின் இந்த எச்சரிக்கை விஜய்யின் அரசியல் நிலைப்பாட்டை மேலும் சோதனைக்கு உள்ளாக்கியுள்ளது. தவெகவின் அடுத்த நகர்வுகள் இப்போது மிகுந்த எதிர்பார்ப்பை ஏற்படுத்தியுள்ளன.