டெல்லியில் சட்டவிரோதமாகக் குடியேறி வசித்து வந்த 25 வங்கதேசத்தினரை போலீசார் அதிரடியாகக் கைது செய்துள்ளனர். நம் அண்டை நாடான வங்கதேசத்தைச் சேர்ந்த பலர், டெல்லியின் பல்வேறு பகுதிகளில் சட்டவிரோதமாகத் தங்கியிருப்பதாக போலீசாருக்கு ரகசியத் தகவல் கிடைத்தது. இதனடிப்படையில் டெல்லி போலீசார் நகரின் பல இடங்களில் தீவிர சோதனையில் ஈடுபட்டனர்.
இந்தச் சோதனையின் போது, உரிய ஆவணங்களின்றி வசித்து வந்த வங்கதேசத்தினரை போலீசார் கண்டறிந்து பிடித்து விசாரித்தனர். அவர்களின் ஆவணங்களைச் சரிபார்த்தபோது, அவர்கள் போலி ஆவணங்களைத் தயாரித்து, உள்ளூர் மக்களுடன் மக்களாகச் சட்டவிரோதமாகத் தங்கி வந்தது உறுதி செய்யப்பட்டது. கைது செய்யப்பட்டவர்களிடமிருந்து சில இந்திய அடையாள ஆவணங்களையும் போலீசார் பறிமுதல் செய்துள்ளனர்.
இது குறித்துப் பேசிய அதிகாரிகள், கைது செய்யப்பட்ட 25 பேர் மீதும் சட்டரீதியான நடவடிக்கைகள் எடுக்கப்பட்டு வருவதாகவும், விசாரணைக்குப் பிறகு அவர்கள் விரைவில் வங்கதேசத்திற்கு நாடு கடத்தப்படுவார்கள் என்றும் தெரிவித்துள்ளனர். இந்தச் சம்பவம் டெல்லியில் பெரும் பரபரப்பை ஏற்படுத்தியுள்ளது.