ஒரு தந்தையின் அன்பும் பொறுப்பும் நிறைந்த ஒரு சாதாரண காலை, யாரும் எதிர்பாராத வகையில் மிகப் பெரிய சோகமாக மாறிய சம்பவம் உத்தரப்பிரதேசத்தில் நடந்துள்ளது. பள்ளி வாசலிலேயே நிகழ்ந்த இந்த துயர சம்பவம், சமூக வலைதளங்களில் வெளியாகி பலரது மனதையும் கலங்க வைத்துள்ளது.
உத்தரப்பிரதேசத்தைச் சேர்ந்த 40 வயதான தாரிக் மேவதி, தனது மூன்று வயது மகளை வழக்கம்போல் பள்ளியில் பாதுகாப்பாக விட்டுவிட்டு திரும்பும் தருணத்தில் திடீரென நிலை தடுமாறி கீழே விழுந்தார். உடனடியாக அருகிலிருந்தவர்கள் உதவ முயன்றாலும், அவருக்கு ஏற்பட்டது கடுமையான மாரடைப்பு என்பது பின்னர் உறுதி செய்யப்பட்டது.
மயங்கி விழுந்த அவரை அவசரமாக மருத்துவமனைக்கு கொண்டு செல்ல முயன்றபோதும், செல்லும் வழியிலேயே அவர் உயிரிழந்ததாக மருத்துவர்கள் தெரிவித்தனர்.
பள்ளி வாசலில் தந்தை கீழே விழுந்ததை அறியாத அந்தச் சிறுமி, அமைதியாக பள்ளிக்குள் நடந்து செல்லும் காட்சி CCTV Video மூலம் வெளியாகி பார்ப்பவர்களின் கண்களில் கண்ணீரை வரவழைத்துள்ளது. மகளை பள்ளியில் விட்ட அந்த நொடி தான், தந்தையும் மகளும் ஒன்றாகக் கழித்த கடைசி தருணம் என்பது பலரையும் உலுக்கியுள்ளது. பள்ளி வாசலில் நபர் உயிரிழந்த சம்பவம் தொடர்பாக போலீசார் விசாரணை நடத்தி வருகின்றனர். இந்த திடீர் இழப்பு, குடும்பத்தினரையும் அப்பகுதி மக்களையும் ஆழ்ந்த சோகத்தில் ஆழ்த்தியுள்ளது.