ஆசிய கோப்பை T20 2025 இறுதிப் போட்டியில் (செப்டம்பர் 28, 2025) பாகிஸ்தானை 5 விக்கெட்டுகள் வித்தியாசத்தில் வீழ்த்தி இந்திய அணி 9வது முறையாக கோப்பையை வென்றது. இந்த வெற்றியில் முக்கிய பங்காற்றிய இந்திய வீரர் திலக் வர்மா, தனது (69ரன்) இன்னிங்ஸ் மூலம் பாகிஸ்தானுக்கு மைதானத்தில் தக்க பதிலடி கொடுத்ததாக செய்தியாளர்களிடம் தெரிவித்தார்.
துபாய் சர்வதேச கிரிக்கெட் மைதானத்தில் நடந்த இந்தப் போட்டியில், பாகிஸ்தான் 20 ஓவர்களில் 146/8 ரன்கள் எடுத்தது. இந்தியா 19.4 ஓவர்களில் 150/5 ரன்கள் எடுத்து 6 பந்துகள் மீதம் இருக்க வெற்றி பெற்றது. திலக் வர்மா, செய்தியாளர்களிடம் பேசுகையில், “பாகிஸ்தான் வீரர்கள் கடுமையாக முயற்சித்தனர். நாங்கள் 3 விக்கெட்டுகளை இழந்தபோது அவர்கள் எங்களை கடுமையாக தாக்கினர். ஆனால், எனக்கு முக்கியமானது அமைதியாக இருந்து, நல்ல ஆட்டத்தை வெளிப்படுத்தி, ஆட்டத்தை வெல்வது. வெற்றிக்குப் பிறகு, அவர்களுக்கு மைதானத்தில் சரியான பதிலடி கொடுத்தேன், எல்லோரும் அதைப் பார்த்தனர்,” என்று சிரித்தபடி கூறினார்.
வர்மாவின் அமைதியான ஆட்டம் அணியை வெற்றி பாதைக்கு அழைத்துச் சென்றது.“3 விக்கெட்டுகள் விழுந்தபோது அழுத்தம் இருந்தது. ஆனால், அமைதியாக இருந்து, நாட்டுக்காக ஆட்டத்தை முடிக்க வேண்டும் என்று முடிவு செய்தேன். பாகிஸ்தான் வீரர்கள் பந்துவீச்சில் வேகத்தை கலந்து வீசினர், ஆனால் நான் என் ஆட்டத்தை நம்பினேன். சஞ்சு சாம்சனின் சிறப்பான இன்னிங்ஸ், ரிங்கு சிங் இன்னிங்சும் முக்கியமானது.
மேலும், தொடர்ந்து பேசிய அவர் “இந்த வெற்றி எங்களுக்கு மிகவும் சிறப்பானது. அணியின் தயாரிப்பு, ஆதரவு குழு, ரசிகர்களின் உற்சாகம் எல்லாம் இந்த வெற்றிக்கு காரணம். பாகிஸ்தானுக்கு எதிராக வெல்வது எப்போதும் ரசிகர்களுக்கு பெரிய பரிசு. இந்த வெற்றி 2026 T20 உலகக் கோப்பைக்கு எங்களுக்கு பெரிய உத்வேகம்,” என்று வர்மா உற்சாகமாகத் தெரிவித்தார்.