சூப்பர் ஸ்டார் ரஜினிகாந்தின் ‘கூலி’ திரைப்படம் ஆகஸ்ட் 14, 2025 அன்று வெளியாகவுள்ள நிலையில், சென்னையை தளமாகக் கொண்ட UNO Aqua Care நிறுவனம் தனது ஊழியர்களுக்கு அன்றைய தினம் விடுமுறை அறிவித்து, இலவச டிக்கெட் வழங்குவதாக அறிவித்துள்ளது. இந்த அறிவிப்பு, சென்னை, பெங்களூரு, திருச்சி, திருநெல்வேலி, செங்கல்பட்டு, மாட்டுத்தாவணி, ஆரப்பாளையம் உள்ளிட்ட நிறுவனத்தின் அனைத்து கிளைகளுக்கும் பொருந்தும்.
இந்த முடிவு, ஊழியர்களிடமிருந்து விடுப்பு கோரிக்கைகள் குவிவதை தவிர்க்கவும், ரஜினிகாந்தின் 50-வது திரைப்பயண ஆண்டை கொண்டாடவும் எடுக்கப்பட்டுள்ளது.நிறுவனத்தின் அதிகாரப்பூர்வ அறிவிப்பில், “சூப்பர் ஸ்டார் ரஜினியின் ‘கூலி’ பட வெளியீட்டை முன்னிட்டு, ஆகஸ்ட் 14, 2025 அன்று விடுமுறை அறிவிக்கிறோம். இது எச்.ஆர். துறையில் விடுப்பு கோரிக்கைகள் குவிவதை தவிர்க்க உதவும். மேலும், ரஜினியின் 50-வது ஆண்டு திரைப்பயணத்தை ‘ரஜினிசம்’ கொண்டாட்டமாக, ஆதரவற்றோர் இல்லங்கள் மற்றும் முதியோர் இல்லங்களுக்கு உணவு வழங்குதல், பொதுமக்களுக்கு இனிப்புகள் விநியோகித்தல் முயற்சியாக UNO Aqua ஊழியர்களுக்கு இலவச ‘கூலி’ டிக்கெட்டுகள் வழங்குதல் ஆகியவற்றை மேற்கொள்கிறோம்,” என்று குறிப்பிடப்பட்டுள்ளது.
இந்த அறிவிப்பு, ரஜினிகாந்தின் ரசிகர்களிடையே பெரும் உற்சாகத்தை ஏற்படுத்தியுள்ளது. “அப்பாவும், தாத்தாவும் வந்தார்கள், போனார்கள்… தவறோ, சரியோ, எப்போதும் ரஜினிசம் பண்ணு… மகன்களும், பேரன்களும் வந்தாலும், எங்கள் ஒரே சூப்பர் ஸ்டார் என்று புகழப்படுவார்,” என்று அறிவிப்பில் ரஜினியின் புகழை வெளிப்படுத்தும் வாசகங்கள் இடம்பெற்றுள்ளன.
கூலி படத்திற்கு தங்களுடைய நிறுவன ஊழியர்களுக்கு நிறுவனம் விடுமுறை அறிவித்துள்ளது பெரிய அளவில் கவனத்தை ஈர்த்துள்ளது. .‘கூலி’ படத்தின் வெளியீடு, ரஜினிகாந்தின் 50-வது திரைப்பயண ஆண்டை முன்னிட்டு, தமிழ்நாட்டில் மட்டுமல்லாமல் உலகளவிலும் பெரும் எதிர்பார்ப்பை ஏற்படுத்தியுள்ளது. படம் வெளியாக இன்னும் சில நாட்கள் மட்டுமே இருக்கும் நிலையில், டிக்கெட் புக்கிங் வேகமாக புக் ஆகி வருகிறது. வசூல் ரீதியாகவும் படம் பெரிய சாதனை படைக்கும் எனவும் எதிர்பார்க்கப்படுகிறது.