திருச்சியில் தடை செய்யப்பட்ட புகையிலை பொருட்களை விற்பனை செய்த இரண்டு பேரை போலீசார் வெவ்வேறு சம்பவங்களில் கைது செய்து, அவர்களிடமிருந்து பொருட்களைப் பறிமுதல் செய்துள்ளனர்.
கருமண்டபம்: திருச்சி கருமண்டபம் சோதனை சாவடி பகுதியில் புகையிலை பொருட்கள் விற்பனை செய்யப்படுவதாகக் கிடைத்த ரகசிய தகவலின் பேரில், செசன்ஸ் போர்ட் போலீஸ் சப்-இன்ஸ்பெக்டர் ஜெயக்குமார் தலைமையிலான போலீசார் அதிரடி சோதனை நடத்தினர். அப்போது, தென்னூர் அண்டகொண்டான் பகுதியைச் சேர்ந்த பர்வேஸ் (24) என்ற வாலிபர் புகையிலை பொருட்களை விற்றுக்கொண்டிருந்தது தெரியவந்தது. இதையடுத்து போலீசார் அவரை கைது செய்து சிறையில் அடைத்தனர்.
வண்ணாரப்பேட்டை: இதேபோல், வண்ணாரப்பேட்டை மெயின் ரோடு பகுதியில் உள்ள ஒரு கடைக்கு அருகில் புகையிலை பொருட்கள் விற்கப்படுவதாக சப்-இன்ஸ்பெக்டர் தீபிகாவுக்கு தகவல் கிடைத்தது. அங்கு விரைந்த போலீசார், சோதனையில் ஈடுபட்டபோது புகையிலை பொருட்களை விற்பனை செய்த சையது அகமது பக்கர் (42) என்பவரைப் பிடித்து கைது செய்தனர். அவரிடமிருந்த புகையிலை பாக்கெட்டுகளும் பறிமுதல் செய்யப்பட்டன.