சென்னை : வள்ளுவர் கோட்டத்தில் நடைபெற்ற ‘திமுக – 75 அறிவுத் திருவிழா’வில் முதலமைச்சரும் திமுக தலைவருமான மு.க. ஸ்டாலின் உரையாற்றினார். திமுகவின் 75 ஆண்டு பயணத்தை நினைவுகூரும் இவ்விழாவுக்கு ‘அறிவுத் திருவிழா’ என்று பெயர் சூட்டியதை பெரிதும் பாராட்டிய அவர், இப்பெயரை துணை முதலமைச்சர் உதயநிதி ஸ்டாலின் வைத்ததாகவும், அது மிகவும் பொருத்தமானது என்றும் தெரிவித்தார். அறிவை மையப்படுத்தி அறிவொளியை பரப்புவதே திமுகவின் தலையாய கடமை என்று முதல்வர் வலியுறுத்தினார்.
திமுகவைத் தொடங்கியவர் அண்ணா, கட்சியைக் கட்டிக் காத்தவர் கலைஞர் என்று நினைவுகூர்ந்த மு.க. ஸ்டாலின், திமுக உழைத்த உழைப்பு சாதாரண உழைப்பு அல்ல என்று பெருமிதம் தெரிவித்தார். “திமுகவின் வரலாறு தெரியாத சிலர் நம்மை மிரட்டிப் பார்க்கிறார்கள். திமுகவைப் போல வெற்றி பெறுவோம் என சிலர் பகல் கனவு காண்கிறார்கள். திமுகவைப் போல் வெற்றிபெற திமுகவைப் போன்ற அறிவும் உழைப்பும் தேவை” என்று எதிர்க்கட்சிகளை மறைமுகமாக சாடினார்.
துணை முதலமைச்சர் உதயநிதி ஸ்டாலின் மீதான நம்பிக்கை வீண் போகவில்லை என்று உருக்கமாகப் பேசிய முதல்வர், அறிவுத் திருவிழாவுக்கான பணிகளை உதயநிதி சிறப்பாக செய்ததாகப் பாராட்டினார். “மகன் தந்தைக்கு ஆற்றும் உதவி இவன் தந்தை என்நோற்றான் கொல் எனும் சொல்” எனும் திருக்குறளை மேற்கோளிட்டு, உதயநிதி கொள்கைப்பிடிப்புடன் செயல்பட்டு வருவதாகவும், இந்த அறிவுத் திருவிழா ஆண்டுதோறும் நடத்தப்பட வேண்டும் என்றும் வலியுறுத்தினார்.
“இளைஞர்கள் மீது எனக்கு நம்பிக்கை அதிகம். ஒரே சூரியன், ஒரே சந்திரன், ஒரே திமுகதான். திராவிடம் வெல்லும். அதை காலம் சொல்லும். இது கூடி கலையும் கூட்டம் அல்ல. காலம் தோறும் கூர்தீட்டும் கூட்டம்” என்று உரையாற்றிய மு.க. ஸ்டாலின், திமுகவின் எதிர்காலம் இளைஞர்களிடமும், கொள்கையிடமும் பத்திரமாக உள்ளது என்று உறுதிபடத் தெரிவித்தார். இளைஞர்களுக்கு உத்வேகம் அளிக்கும் வகையில் அவரது உரை அமைந்தது.
திமுகவின் 75 ஆண்டு கொண்டாட்டத்தின் முத்தாய்ப்பாக அமைந்த இந்த அறிவுத் திருவிழா, கட்சியின் அடித்தளமான அறிவொளி மற்றும் திராவிட கொள்கையை மீண்டும் வலியுறுத்தியது. முதலமைச்சரின் உரை தொண்டர்கள் மத்தியில் பெரும் உற்சாகத்தை ஏற்படுத்தியது.