தமிழ் சினிமாவின் முன்னணி நட்சத்திரம் அஜித்குமார், இன்று (அக்டோபர் 28, 2025) அதிகாலை திருப்பதி ஏழுமலையான் கோயிலில் சாமி தரிசனம் செய்தார். சுப்ரபாத சேவையின் போது வரிசையில் நின்று தரிசனம் செய்த அவர், ரசிகர்களால் “தல… தல…” என்று கோஷமிடப்பட்டபோது, “இது கோயில், கொஞ்சம் அமைதியா இருங்கள்” என்று அன்புடன் சைகை செய்து அறிவுறை வழங்கினார். இந்த வீடியோக்கள் தற்போது சமூக வலைத்தளங்களில் வைரலாகி, ரசிகர்களிடம் பெரும் வரவேற்பைப் பெற்றுள்ளன.
அஜித், தரிசனத்திற்குப் பிறகு ரசிகர்களுடன் இணைந்து புகைப்படங்கள் எடுத்துக்கொண்டது, அவரது அணுகுமுறையை மேலும் உயர்த்திக் காட்டியது. அவருடைய நடிப்பில் அண்மையில் வெளியான ‘குட் பேட் அக்லி’ திரைப்படம் ரசிகர்களிடம் நல்ல வரவேற்பைப் பெற்ற நிலையில், அஜித் கார் ரேசிங்கில் தீவிர கவனம் செலுத்தி வருகிறார். ஸ்பெயினில் நடந்த 24 மணி நேர கார் பந்தயத்தில் மூன்றாம் இடம் பிடித்த அவர், இந்த ஆண்டு மலேசியாவிலும், 2026-இல் அபுதாபியிலும் தனது ரேசிங் அணியுடன் பங்கேற்க உள்ளார்.
இதற்கிடையில், அடுத்த திரைப்படத்தின் ப்ரீ-புரொடக்ஷன் பணிகள் நடந்து வருகின்றன. இயக்குநர் ஆதிக் ரவிச்சந்திரன் இயக்கும் இந்தப் படம், ஜனரஞ்சகமான கமர்ஷியல் படமாக உருவாகும் என்று தெரிவிக்கப்பட்டுள்ளது. துபாயிலிருந்து இந்தியா திரும்பிய அஜித், சமீபத்தில் குடும்பத்துடன் கேரளாவின் ஊட்டுகுளங்கர பகவதி அம்மன் கோயிலில் தரிசனம் செய்தார். அப்போது வெளியான புகைப்படத்தில், அவரது நெஞ்சில் பகவதி அம்மன் டாட்டூ இருந்தது கவனம் ஈர்த்தது. இது அவரது குலதெய்வம் என்று கூறப்படுகிறது.
அதனைதொடர்ந்து இப்போது திருப்பதி தரிசனம், அவரது ஆன்மிக அக்கறையை மீண்டும் வெளிப்படுத்தியுள்ளது. கோயிலில் ரசிகர்களை அமைதியாக இருக்கச் சொன்ன அஜித்தின் செயல், அவரது பொறுப்புணர்வைப் பாராட்ட வைத்துள்ளது. அஜித்குமார், சினிமா மற்றும் விளையாட்டுக்கு அப்பால், ஆன்மிகத்தில் ஆழ்ந்த ஈடுபாடு கொண்டவர். திருப்பதி கோயிலில் ரசிகர்களின் கோஷத்தை அன்புடன் தடுத்து, கோயிலின் புனிதத்தைப் பேணிய அவரது நடத்தை, பலருக்கும் முன்மாதிரியாக அமைந்தது.