தவெக தலைவர் விஜயின் கரூர் வேலுச்சாமிபுரம் பிரச்சாரக் கூட்டத்தில் (செப்டம்பர் 27, 2025) ஏற்பட்ட கூட்ட நெரிசலில் 41 பேர் உயிரிழந்த சம்பவத்தில், உடற்கூராய்வு செயல்முறைகள் குறித்த சர்ச்சை எழுந்துள்ளது. தவெக கட்சி, வழக்கறிஞர் “உயிரிழந்த 41 பேருக்கும் அவசரமாக ஒரே நாளில் உடற்கூராய்வு செய்தது ஏன்? சூரிய அஸ்தமனத்திற்குப் பிறகு உடற்கூராய்வு செய்யக்கூடாது என்பது விதி, ஆனால் இரவில் 39 பேருக்கு எப்படி சாத்தியமானது?
தகுதியான மருத்துவர்கள் உடற்கூராய்வு செய்தார்களா? விஜய் பிரச்சார இடத்திற்கு அதிக ஆம்புலன்ஸ்கள் வந்ததிலும் சந்தேகம் உள்ளது. 500 போலீஸார் பாதுகாப்பில் இருந்தனர் என்பது பொய்,” என்று குற்றம் சாட்டியுள்ளார். அது மட்டுமின்றி, த.வெ.க தரப்பு மதுரை உயர்நீதிமன்றத்தில் சிபிஐ விசாரணை கோரி முறையீடு செய்துள்ளது. இந்த கோரிக்கை, சம்பவத்தின் விசாரணையை தேசிய அளவுக்கு கொண்டு சென்றுள்ளது. மதுரை உயர்நீதிமன்றம், தவெக மனுவை இன்று (செப்டம்பர் 29) ஏற்க மறுத்து, நாளை (செப்டம்பர் 30) தாக்கல் செய்ய அறிவுறுத்தியுள்ளது.
பதிவாளர், “நாளை தாக்கல் செய்தாலும், வெள்ளிக்கிழமை (அக்டோபர் 3) தான் விசாரணை நடத்தப்படும்,” என்று தெரிவித்தார். இதையடுத்து, தவெக கட்சி, சென்னை உயர்நீதிமன்றத்தில் முறையிட திட்டமிட்டுள்ளது. கட்சி இணைப் பொதுச் செயலாளர் சி.டி. நிர்மல் குமார், இது குறித்து நேற்று செய்தியாளர்களை சந்தித்து பேசும்போது “நாளை மதியம் 2.15 மணிக்கு மதுரை அமர்வில் விசாரணை நடைபெறும். அதன் பிறகு நம் நிலைப்பாட்டை தெரிவிப்போம்,” என்றார். உயிரிழந்த குடும்பங்களை சந்திக்க விஜய் கரூர் வருவாரா என்ற கேள்விக்கு அவர் பதிலளிக்கவில்லை. இந்த சம்பவத்தில், தவெக பொதுச் செயலாளர் புஸ்ஸி ஆனந்த் மீது 4 கடுமையான பிரிவுகளில் வழக்கு பதிவு செய்யப்பட்டுள்ளது.
மேலும், இந்த துயரமான சம்பவத்தில் உயிரிழந்தவர்களின் குடும்பத்தினருக்கு முதல்வர் மு.க. ஸ்டாலின் ரூ.10 லட்சம், பிரதமர் மோடி ரூ.2 லட்சம், விஜய் ரூ.20 லட்சம் நிவாரணம் அறிவித்துள்ளனர். துணை முதல்வர் உதயநிதி ஸ்டாலின் கரூரில் ஆறுதல் கூறினார். திமுக எம்.பி. கனிமொழி, “கூட்டத்தை கட்டுப்படுத்துவது கட்சியின் கடமை,” என்று விமர்சித்தார் என்பதும் குறிப்பிடத்தக்கது.