செங்கோட்டை அருகே கடந்த நவம்பர் 10-ஆம் தேதி மாலை நடந்த பயங்கர கார் குண்டுவெடிப்பு சம்பவத்தில் புதிய திருப்பமாக, காரை ஓட்டியதாக சந்தேகிக்கப்படும் முகமது உமர் நபியின் நெருங்கிய நண்பர் சஜித் அஹமதுவை ஜம்மு-காஷ்மீர் போலீசார் புல்வாமா பகுதியில் கைது செய்துள்ளனர். சஜித் அஹமதுவிடம் என்ஐஏ மற்றும் காஷ்மீர் போலீசார் இணைந்து தீவிர விசாரணை நடத்தி வருகின்றனர். இந்தக் கைது வெடிப்பின் பின்னணி, திட்டமிடல், தொடர்புடையவர்கள் குறித்து முக்கிய தகவல்களை வெளிக்கொணரும் என்று என்ஐஏ அதிகாரிகள் நம்பிக்கை தெரிவித்துள்ளனர்.
முகமது உமர் நபி இன்னும் தலைமறைவாக உள்ள நிலையில், சஜித் அஹமதுவின் வாக்குமூலம் அவரைப் பிடிக்க உதவும் என்று எதிர்பார்க்கப்படுகிறது.வெடிப்பு சம்பவத்தின் எதிரொலியால் செங்கோட்டை பகுதி முழுமையாக நவம்பர் 13-ஆம் தேதி வரை மூன்று நாட்களுக்கு மூடப்பட்டுள்ளது. பொதுமக்கள், சுற்றுலாப்பயணிகள், வாகனங்கள் யாரும் அனுமதிக்கப்பட மாட்டார்கள் என்று டெல்லி போலீசார் கட்டுப்பாடுகளை விதித்துள்ளனர். இது பாதுகாப்பு காரணங்களுக்காகவே என்று தெரிவிக்கப்பட்டுள்ளது.
வெடிப்பு நடந்த இடம் செங்கோட்டைக்கு மிக அருகில் உள்ளதால், அப்பகுதியில் தீவிர சோதனை மற்றும் கண்காணிப்பு நடக்கிறது.செங்கோட்டை அருகே உள்ள லால் கிலா மெட்ரோ நிலையமும் தற்காலிகமாக மூடப்பட்டுள்ளது. பயணிகள் அருகிலுள்ள மற்ற மெட்ரோ நிலையங்களைப் பயன்படுத்துமாறு அறிவுறுத்தப்பட்டுள்ளது. மெட்ரோ ரயில்கள் அந்த நிலையத்தில் நிற்காமல் செல்லும் என்று டெல்லி மெட்ரோ ரயில் கார்ப்பரேஷன் அறிவித்துள்ளது.
இது பயணிகளுக்கு சிரமத்தை ஏற்படுத்தினாலும், பாதுகாப்பு முன்னெச்சரிக்கையாக இந்த நடவடிக்கை எடுக்கப்பட்டுள்ளது. இந்தக் கைது மற்றும் பகுதி மூடல் நடவடிக்கைகள் வெடிப்பு சம்பவம் திட்டமிட்ட பயங்கரவாத தாக்குதலாக இருக்கலாம் என்ற சந்தேகத்தை மேலும் வலுப்படுத்தியுள்ளது. என்ஐஏ, என்எஸ்ஜி, டெல்லி போலீசார், காஷ்மீர் போலீசார் இணைந்து விசாரணையைத் தீவிரப்படுத்தியுள்ளனர்.
சம்பவ இடத்தில் சிசிடிவி காட்சிகள், தடயங்கள், வெடிபொருள் எச்சங்கள் ஆகியவை ஆய்வு செய்யப்படுகின்றன. மேலும் சந்தேக நபர்கள் கைது செய்யப்பட வாய்ப்புள்ளதாக தகவல்கள் வெளியாகியுள்ளன. டெல்லி மக்கள் இந்தச் சம்பவத்தால் பெரும் பீதியடைந்துள்ளனர்.