தமிழகத்தில் இந்த ஆண்டு கோடைக்காலம் வழக்கத்தை விட அதிக வெப்பத்துடன் இருக்கும் என இந்திய வானிலை ஆய்வு மையம் எச்சரித்துள்ளது. குறிப்பாக மார்ச் மாதம் முதல் மே மாதம் வரையிலான காலப்பகுதியில், வட தமிழகத்தில் இயல்பை விட அதிகமான அளவில் வெப்ப அலை வீசக்கூடும் என்று தெரிவிக்கப்பட்டுள்ளது. இந்த அதீத வெப்பம் காரணமாகப் பொது சுகாதாரம், நீர் விநியோகம், மின்சாரத் தேவை மற்றும் அத்தியாவசிய சேவைகள் பாதிக்கப்பட வாய்ப்புள்ளதாகக் கூறப்படுகிறது.
குறிப்பாக முதியவர்கள், குழந்தைகள், வெயிலில் வேலை செய்யும் தொழிலாளர்கள் மற்றும் நோயாளிகளை இந்த வெப்ப அலைகள் அதிகம் பாதிக்கக்கூடும் என்பதால் பொதுமக்கள் மிகுந்த எச்சரிக்கையுடன் இருக்க அறிவுறுத்தப்பட்டுள்ளது. மக்கள் தாகம் இல்லாவிட்டாலும் அதிகளவில் நீர் அருந்த வேண்டும் என்றும், வெயில் அதிகமாக இருக்கும் நேரங்களில் தேவையற்ற பயணங்களைத் தவிர்க்க வேண்டும் என்றும் வானிலை ஆய்வு மையம் கேட்டுக்கொண்டுள்ளது.