சேலம் மாநகர காவல்துறை, நடிகர் விஜயின் தமிழக வெற்றிக் கழகம் (தவெக) டிசம்பர் 4-ஆம் தேதி நடத்தத் திட்டமிட்டிருந்த பிரச்சார நிகழ்ச்சிக்கு அனுமதி மறுத்து, அதிகாரப்பூர்வ விளக்கக் கடிதம் அனுப்பியுள்ளது. கடிதத்தில் மறுப்புக்கான முக்கிய காரணங்களாக இரண்டு விஷயங்கள் குறிப்பிடப்பட்டுள்ளன. அதில், ஒன்று, டிசம்பர் முதல் வாரத்தில் கார்த்திகை தீபத் திருவிழாவை முன்னிட்டு திருவண்ணாமலைக்கு பெரும்பாலான போலீஸார் பாதுகாப்பு பணிக்கு அனுப்பப்படுவதால், சேலத்தில் போதிய போலீசை ஒதுக்க முடியாது என்பது.
இரண்டாவது, தவெக தாக்கல் செய்த மனுவில் “நிகழ்ச்சியில் எத்தனை பேர் கலந்து கொள்வார்கள், வெளி மாவட்டங்களில் இருந்து எத்தனை பேர் வருவார்கள்” என்ற தெளிவான எண்ணிக்கை குறிப்பிடப்படவில்லை என்பதும் ஆகும்.காவல்துறை, இந்தக் குறைபாடுகளை நிவர்த்தி செய்து மீண்டும் மனு அளித்தால் பரிசீலிக்கப்படும் என்று தெரிவித்துள்ளது. மேலும், இனி வரும் காலங்களில் இதுபோன்ற பெரிய மக்கள் சந்திப்பு அல்லது பிரச்சார நிகழ்ச்சிகளுக்கு குறைந்தபட்சம் நான்கு வாரங்களுக்கு முன்னதாகவே (அதாவது ஒரு மாதத்துக்கு முன்) அனுமதி கோரி மனு அளிக்க வேண்டும் என்று தவெகவுக்கு தெளிவாக அறிவுறுத்தியுள்ளது.
முன்கூட்டியே தெரிவித்தால் போதிய பாதுகாப்பு ஏற்பாடு செய்ய முடியும் என்றும் காவல்துறை குறிப்பிட்டுள்ளது.கரூரில் கடந்த செப்டம்பர் மாதம் நடந்த பிரச்சாரக் கூட்டத்தில் ஏற்பட்ட பயங்கர கூட்ட நெரிசலால் 41 பேர் உயிரிழந்த சம்பவத்துக்குப் பிறகு, தமிழக காவல்துறை பெரிய அளவிலான பொதுக்கூட்டங்கள் மற்றும் பிரச்சார நிகழ்ச்சிகளுக்கு மிகக் கடுமையான நிபந்தனைகளை விதித்து வருகிறது. கூட்ட அளவு, பங்கேற்பாளர்களின் எண்ணிக்கை, வெளி மாவட்டங்களில் இருந்து வரும் வாகனங்கள், மருத்துவ உதவிக் குழு, தீயணைப்பு வசதி போன்ற விவரங்களை முன்கூட்டியே தெரிவிக்க வேண்டும் என்று வலியுறுத்துகிறது.
இதன் காரணமாகவே சேலம் நிகழ்ச்சிக்கு அனுமதி மறுக்கப்பட்டுள்ளது.இந்த அனுமதி மறுப்பு, தவெகவின் 2026 சட்டமன்றத் தேர்தல் பிரச்சாரத் திட்டங்களுக்கு சிறிய தடையாக அமைந்துள்ளது. கரூர் சம்பவத்துக்குப் பிறகு முதல் பெரிய பிரச்சாரமாக இது இருக்க வேண்டும் என்று எதிர்பார்க்கப்பட்ட நிலையில், தவெக இப்போது குறைபாடுகளை சரி செய்து, புதிய தேதியைத் தேர்வு செய்து மீண்டும் மனு அளிக்க வேண்டிய நிலை உருவாகியுள்ளது.