வங்கதேசத்தில் சிறுபான்மையினரான இந்துக்கள் மீதான வன்முறை நாளுக்கு நாள் அதிகரித்து வருகிறது. நேற்று ஒரே நாளில் இருவர் கொடூரமாகப் படுகொலை செய்யப்பட்ட சம்பவம் சர்வதேச அளவில் பெரும் அதிர்ச்சியை ஏற்படுத்தியுள்ளது.
வங்கதேசத்தில் கடந்த 2025-ம் ஆண்டு இறுதி முதல் தற்போது வரையிலான வெறும் 18 நாட்களில் மட்டும் 6 இந்துக்கள் கொல்லப்பட்டுள்ளனர். முன்னதாக மைமன்சிங், ராஜ்பாரி பகுதிகளில் அமிர்த் மண்டல் மற்றும் திபு சந்திர தாஸ் ஆகியோர் கும்பலால் அடித்துக் கொல்லப்பட்டனர். டிசம்பர் 31 அன்று பஜேந்திர பிஸ்வாஸ் என்ற காவலாளி சுட்டுக் கொல்லப்பட்டார். மேலும், புத்தாண்டு அன்று எரிக்க முயன்றதில் படுகாயமடைந்த கோகன் சந்திர தாஸ் சிகிச்சை பலனின்றி கடந்த 3-ம் தேதி உயிரிழந்தார்.
வன்முறையின் உச்சக்கட்டமாக நேற்று இரண்டு மாவட்டங்களில் படுகொலைகள் நிகழ்ந்துள்ளன:
- ஜேஷோர் மாவட்டம்: பத்திரிகை ஆசிரியரான ராணா பிரதாப் பைராகி (45) என்பவரை ஒரு கும்பல் தொழிற்சாலையிலிருந்து வெளியே வரவழைத்து, துப்பாக்கியால் சுட்டும், கழுத்தை அறுத்தும் கொடூரமாகக் கொலை செய்தது.
- நர்சிங்டி மாவட்டம்: மளிகைக்கடை நடத்தி வந்த மோனி சக்ரவர்த்தி (40) என்பவர், கடையிலிருந்த போதே மர்ம நபர்களால் ஆயுதங்களால் வெட்டிக் கொலை செய்யப்பட்டார்.
மேலும், ஒரு இந்து பெண் கும்பலால் பாலியல் பலாத்காரம் செய்யப்பட்ட கொடுமையும் அரங்கேறியுள்ளது.
இந்தச் சம்பவங்கள் தொடர்பாகச் சிலரைக் கைது செய்துள்ளதாக வங்கதேச அரசு கூறினாலும், இந்துக்களுக்கு எதிரான தாக்குதல்கள் குறைந்தபாடில்லை. தங்களுக்கு உரியப் பாதுகாப்பு வழங்க வேண்டும் என அந்நாட்டு இந்து அமைப்புகள் கண்ணீருடன் கோரிக்கை விடுத்துள்ளன.
இந்தக் கொடூரச் சம்பவங்களுக்கு இந்தியா கடும் கண்டனம் தெரிவித்துள்ளது. வங்கதேசத்தில் நிலவி வரும் சூழலை மிகுந்த கவலையுடன் உற்று நோக்கி வருவதாக இந்திய வெளியுறவுத் துறை அமைச்சகம் தெரிவித்துள்ளது.